Ֆուտբոլի Հայաստանի ազգային հավաքականի ավագ Հենրիխ Մխիթարյանը ցանկանում է կարիերան շարունակել «Ռոմայում»։ Մեր ֆուտբոլիստին հոգեհարազատ է հարձակողական ֆուտբոլը, որը դավանում է իտալական թիմի պորտուգալացի գլխավոր մարզիչ Պաուլու Ֆոնսեկան։
«Ունայ Էմերիի փիլիսոփայությունը միանգամայն տարբեր է Ֆոնսեկայի ոճից։ «Ռոմայում» ինձ շատ ավելի լավ եմ զգում, քանի որ մենք խաղում ենք գեղեցիկ ֆուտբոլ, որն ինձ շատ ավելի հարմար է: Այո, նախընտրում եմ Ֆոնսեկայի ֆուտբոլը, քանի որ մենք խաղում ենք հարձակողական ոճով՝ փորձելով գնդակը պահել առջևի գծում։ Կրկնում եմ, որ ինձ դուր է գալիս ֆուտբոլի այս ոճը: Արդյոք կմնա՞մ Հռոմում: Հիմա ես ոչինչ չեմ կարող ասել, քանի որ մրցաշրջանը դադարեցված է, մենք չգիտենք, թե երբ նորից կսկսենք խաղալ, և ինչ կլինի ամռանը: Ֆուտբոլն արագորեն փոխվում է: Սկզբում մեկ թիմում ես, իսկ որոշ ժամանակ անց՝ արդեն մյուսում: Երբեք չգիտես, թե ինչ կարող է տեղի ունենալ ապագայում»,- իտալական La Gazetta dello Sport-ի թղթակցի հետ զրույցում ասել է Մխիթարյանը։
Ավելի վաղ հայ ֆուտբոլիստը դարձյալ ակնարկել էր, որ ցանկանում է դառնալ «Ռոմայի» ֆուտբոլիստ։ «Հիմա պետք է մտածել միայն առաջիկա երեք ամիսների մասին: Վաղ է խոսել իմ ապագայից: Կարող եմ ասել, որ ինձ դուր են գալիս այս թիմը, քաղաքը և երկրպագուները»,- Մխիթարյանի խոսքերը մեջբերել էր Coriere dello Sport-ը:
Թե՛ իտալական և թե՛ բրիտանական լրատվամիջոցները գրում են, որ «Ռոման» մտադիր է ձեռք բերել Մխիթարյանի տրանսֆերը։ Հիշեցնենք, որ մեր ֆուտբոլիստի տրանսֆերը պատկանում է Լոնդոնի «Արսենալին», իսկ իտալական ակումբում ելույթ է ունենում վարձակալության հիմունքներով։ Պայմանագիրը նախատեսված էր մինչև ընթացիկ մրցաշրջանի ավարտը։
Հաշվի առնելով, սակայն, կորոնավիրուսի տարածման հետ կապված վերջին զարգացումները՝ դժվար է ասել, թե ինչ ճակատագիր է սպասում վարձավճարով հանդես եկող ֆուտբոլիստներին։ Ինչ խոսք, ցանկալի կլինի, որ Մխիթարյանը վերջնականապես դառնա «Ռոմայի» ֆուտբոլիստ։ Իր վերջին հարցազրույցով մեր հավաքականի ավագը վերջնականապես բացեց փակագծերը իր ցանկությունների և նպատակների վերաբերյալ։ Միակ խանգարող հանգամանքը թերևս ֆինանսական կողմն է։ Ավելի ստույգ՝ հնարավոր է «Ռոման» չկարողանա բավարարել «Արսենալի» պահանջը տրանսֆերի իրականացման առումով։
Ըստ Сorriere dello sport պարբերականի՝ ամռանը «Արսենալը» կվաճառի Մխիթարյանի տրանսֆերը և դրա համար կպահանջի 25 միլիոն եվրո: Մամուլում տարածված տեղեկությունների համաձայն էլ՝ «Ռոման» կարող է Մխիթարյանի համար վճարել միայն 14 միլիոն եվրո։
Այնուամենայնիվ հարկ ենք համարում նշել, որ կապված կորոնավիրուսի շուրջ ստեղծված իրավիճակի հետ՝ թե՛ տրանսֆերային շուկայում և թե՛ ընդհանրապես համաշխարհային ֆուտբոլում հնարավոր են վայրիվերումներ։
Ինչևէ, Մխիթարյանը «Ռոմայում» նորամուտը նշել էր անցյալ տարվա սեպտեմբերի 15-ին Ա սերիայի 3-րդ տուրի «Սասուլոյի» դեմ մրցավեճում։ Այս խաղում տպավորությունն այնպիսին էր, որ հայ ֆուտբոլիստը երկար տարիներ խաղացել է Հռոմի թիմում և 5 մատի պես գիտի խաղային բոլոր նյուանսները: Շատերն արդեն իսկ պնդում էին, որ «Ռոման» Մխիթարյանի թիմն է, որտեղ նա իրեն զգում է՝ ինչպես ձուկը ջրում: Բնական է, որ մեկ խաղով դժվար էր նման համոզմունքի գալը, բայց այն, որ Մխիթարյանը «Ռոմայում» շատ ավելի ազատ և անկաշկանդ ֆուտբոլ ցուցադրեց ընթացիկ մրցաշրջանի առաջին հատվածում, արդեն իսկ փաստ է: Ավելի ստույգ՝ լավատեղյակ լինելով Մխիթարյանի որակներին՝ «Ռոմայի» գլխավոր մարզիչ Պաուլու Ֆոնսեկան նրա առաջ դրսևորվելու լայն հորիզոն է բացել:
«Հենրիխ Մխիթարյանն այն ֆուտբոլիստներից է, որոնց ես բոլորից շատ եմ սիրում։ Նա շատ խելացի է, հեշտ է հարմարվում բոլոր խաղային սխեմաներին, ունի բացառիկ արագություն և դիմացկունություն։ Ես նրան ստիպում էի խաղալ որպես «եզրափակող», և նա շատ ուժեղ էր այդ դիրքում։ Անգլիայում նրան օգտագործեցին այլ դիրքերում, որոնք նրան այնքան էլ հոգեհարազատ չէին։ Շուտով Մխիթարյանը կդառնա «Ռոմայի» առանցքային խաղացողներից մեկը»,- հայտարարել էր հայտնի ռումինացի մասնագետ Միրչա Լուչեսկուն։
Վերջինիս գլխավորությամբ Մխիթարյանը 2010-2013 թվականներին փայլուն ելույթով աչքի էր ընկել Դոնեցկի «Շախտյորում»: Լուչեսկուի դիտարկումները միանգամայն դիպուկ կարելի է որակել: Մխիթարյանի բացառիկ արագությունը ցայտուն կերպով աչքի չընկավ Անգլիայի Պրեմիեր լիգայում: Ավելի ստույգ՝ մի շարք այլ գործոններ թույլ չտվեցին, որպեսզի հայ ֆուտբոլիստը գործի դնի իրական ներուժը: Ի տարբերություն Ժոզե Մոուրինյոյի կամ Ունայ Էմերիի՝ Պաուլու Ֆոնսեկան կարծես թե մտադիր է Մխիթարյանից քաղել արդյունավետության ողջ արսենալը: Մրցաշրջանի «Ռոմայի» երկրպագուները սոցիալական ցանցերում պահանջում էին, որ ակումբի ղեկավարությունը երկարաժամկետ պայմանագիր կնքի Հենրիխ Մխիթարյանի հետ: Մխիթարյանի վերջին հարցազրույցը ըստ էության ապացույցն է ռումինացի մասնագետի դիտարկումների։
Մնում է հուսալ, որ «Արսենալն» ու «Ռոման» այնուամենայնիվ կգան ընդհանուր հայտարարի, և մեր հավաքականի ավագը կխաղա այն ֆուտբոլը, որն իրեն հոգեհարազատ է, կխաղա այն թիմում, որտեղ նրա արդյունավետության գործակիցն առավել բարձր է։
