ՀՀԿ խմբակցության ազգային փոքրամասնության ներկայացուցիչ, ազգությամբ եզդի Ռուստամ Մախմուդյանը Armtimes-ի հետ անդադառնալով 2018-ի ապրիլից հետո վարչապետի պաշտոնի հավանական թեկնածուներին, նշել է, որ իրենք՝ եզդիները պատրաստ են ընդունել այն անձին, որին կառաջադրի ՀՀԿ-ն: «Ես քաղաքական կուլիսների խոսակցություններից տեղյակ չեմ: Եզդի համայնքը չէ, որ այս պարագայում պետք է որոշի, թե ով է վարչապետը: Ես ճանապարհ եմ անցնում մի քաղաքական ուժի հետ և նրանց հետ համընդհանուր պետք է որոշենք, թե ում ենք տեսնում վարչապետ»,- նշել է եզդի պատգամավորը:
Նշենք սակայն, որ եզդի համայնքը նույն կուլիսներում խոսում-քննարկում է, որ իր ցանկալի թեկնածուն հենց Կարեն Կարապետյանն է, ում ցանկանում են վարչապետի պաշտոնում տեսնել նաև 2018-ի ապրիլից հետո: Ուշագրավ է, սակայն, որ վարչապետը նախընտրական հանդիպումների ժամանակ, երբ Արագածոտնի մարզ էր մեկնել, նրան դիմավորել էր քրեական հեղինակություն Ջնդի Ամարյանը: Առհասարակ, ըստ տեղեկությունների, նա շատ լավ հարաբերություններ ունի Կարեն Կարապետյանի հետ:
Եզդիների միության նախագահ Ազիզ Թամոյանը «Առաջին լրատվական»-ի հետ զրույցում ասաց, որ եզդիները հակված են Սերժ Սարգսյանի թեկնածությանը: Ում թեկնածությունը կառաջարկի ՀՀԿ-ն, նրա հետ էլ իրենք կհամաձայնեն, բայց շատ կցանկանան, որ այդ թեկնածուն լինի Սերժ Սարգսյանը, քանի որ նա շատ բան է արել իրենց համայնքի համար: «Եթե վարչապետ լինի, ապա մենք կուզենք, որ մենակ պարոն Սարգսյանը լինի: Կարեն Կարապետյանի դեմ ոչինչ չունենք, նա գրագետ, կիրթ մարդ է, բայց մեր ձայնը մեկինն է՝ պարոն Սարգսյանինը։ Մեր նախորդ նախագահները ոչ մի անգամ եղդի բառը չեն օգտագործել, բայց Սերժ Սարգսյանը մեր բոլոր ազգային տոներին մեզ շնորհավորում է, օգնում է մեր համայնքին, մեր հարցերը բարձրացնում է միջազգային հարթակներում»,- ասաց Թամոյանը:
Ինչ վերաբերվում է Ջնդի Ամարյանին և նրա ունեցած ազդեցությանը համայնքի ներկայացուցիչների վրա, ապա Թամոյանն ասաց, որ Ամայանը չի զբաղվում համայնքի խնդիրներով, ինքն է զբաղվում և իր խոսքն է վճռորոշ: Նա անհատ մարդ է և թող ինքը որոշի, թե ում է ուզում: Իսկ ես համայնքի ղեկավարն եմ և այդ ժամանակ համայնքի անունից եմ հանդես գալու: Երբ այդ ժամանակը գա՝ ես կոչ կանեմ, որ պարոն Սարգսյանն անցնի: Ճիշտ է, Ազգային ժողովն է ընտրելու, բայց մենք Սերժ Սարգսյանի կողքին ենք լինելու»,- եզրափակեց Թամոյանը:
Լուսանկարը՝ armtimes.com-ի