«Իրենց տղերքին փող տալու լավ ձևերից մեկն է». ԱԻՄ առաջնորդը՝ «Իրազեկ քաղաքացիների միավորմանը» և ԹԻՀԿ-ին պետբյուջեից գումար տրամադրելու մասին
«Իրենց տղերքին փող տալու լավ ձևերից մեկն է: Ես դեմ չեմ, որ պետությունը վերահսկողության համար որոշ դեպքում նաև դրամաշնորհներ հատկացնի, բայց հասկանալի է, որ պիտի հայտարարություն արվեր դրանից առաջ, պիտի մրցույթ ազդարարվեր»,- այս մասին լրագրողների հետ հանդիպման ժամանակ հայտնեց ԱԻՄ առաջնորդ Պարույր Հայրիկյանը՝ 168.am–ի խնդրանքով անդրադառնալով Արցախում սպասվող ընտրություններին և ՀՀ կառավարության այն որոշմանը, որով այդ ընտրություններին քաղաքացիական հասարակության կողմից դիտորդական առաքելության իրականացման հարցում աջակցություն ցուցաբերելու նպատակով Հայաստանի Հանրապետության վարչապետի աշխատակազմին հատկացվելու է 33 մլն 680.000 դրամ, որից 16 մլն 200 հազար դրամը՝ «Իրազեկ քաղաքացիների միավորման» Ստեփանակերտի գրասենյակին, իսկ 17 մլն 480 հազար դրամ՝ «Թրանսփերենսի ինթերնեշնլ» հակակոռուպցիոն կենտրոնին:
«Ո՞րը պիտի լինի Հայաստանի Հանրապետության դիրքորոշումն Արցախում տեղի ունեցող ընտրությունների վերաբերյալ»՝ մեր հարցին ի պատասխան՝ ԱԻՄ առաջնորդը նշեց.
«Հայաստանի որևէ ընտրությունների նկատմամբ չեզոքությունն է. եթե ընտրություն է, ապա չպետք է խառնվես»:
Հիշեցնենք, որ երեկ Կառավարության նիստում վարչապետի աշխատակազմի ղեկավարի տեղակալ Ծովինար Սողոմոնյանը ներկայացրել էր նախագիծ, համաձայն որի՝ առաջարկվում է Արցախում 2019 թ. սեպտեմբերին տեղական ինքնակառավարման մարմինների (ՏԻՄ) ընտրություններին քաղաքացիական հասարակության կողմից դիտորդական առաքելության իրականացման հարցում աջակցություն ցուցաբերելու նպատակով Հայաստանի Հանրապետության վարչապետի աշխատակազմին հատկացնել 33 մլն 680 հազ. դրամ, որից 16 մլն 200 հազար դրամը՝ «Իրազեկ քաղաքացիների միավորման» Ստեփանակերտի գրասենյակին, իսկ 17 մլն 480 հազար դրամ՝ «Թրանսփերենսի ինթերնեշնլ» հակակոռուպցիոն կենտրոնին: Վարչապետ Փաշինյանը նշել էր, որ կարևորում է ընտրությունների ժամանակ Արցախի ժողովրդի ազատ կամարտահայտության ապահովմանն աջակցելը: Կառավարությունը միաձայն ընդունել էր որոշումը:
Զարուհի Դիլանյան
