«Առաջին լրատվական»-ի զրուցակիցն է ԱԺ «Իմ քայլը» խմբակցության ղեկավար Լիլիթ Մակունցը:
– Եթե ԱԺ անցած քառօրյայից որոշ դրվագներ հաշվի չառնենք, ի՞նչ եք կարծում, կարելի՞ է բնականոն համարել աշխատանքային մթնոլորտը:
– Կարծում եմ, որ բոլորս անխտիր պետք է աշխատենք ավելի բովանդակային քննարկումներ ունենալ և կենտրոնանալ հենց դրա վրա:
– Իսկ ինչո՞ւ չի ստացվում, հետաքրքիր է:
– Տարբեր պատճառներ կան դրա համար. կա սովորույթի համաձայն որոշակի մտքեր արտահայտելու պրակտիկա, որն այս գումարման ԱԺ-ում տեղ չպետք է ունենա, կա նաև այն պատճառը, որ արձագանքում ենք սուր ձևակերպումներին, որոնք անձնական տիրույթում են. սովորաբար «Իմ քայլը» արձագանքողի դերում է լինում այդ պարագայում:
– Բայց այդպիսի վարքագիծը պետք է հիմնավոր պատճառ ունենա, այսինքն՝ ինչու բուն գործով չզբաղվել, ուղղակի ինչ-որ աղմուկ, աժիոտաժ առաջացնել, որևէ միտում տեսնո՞ւմ եք այստեղ:
– ԱԺ նիստերի դահլիճում ինձ մոտ նույնպես այնպիսի տպավորություն է, որ շատ հաճախ ոչ թե գործ ունենք ընդդիմախոսության հետ, այլ ինչ-որ բան է տեղի ունենում, որը երբեք չես կարող անվանել ընդդիմախոսություն: «Իմ քայլը» խմբակցությունը՝ որպես քաղաքական մեծամասնություն, ողջունում է բովանդակային քննարկումները, որոնք վերաբերում են այն խնդիրներին, որոնք մտահոգություններ, տեսակետների բախում են առաջացնում: Մենք, իհարկե, պատրաստակամ ենք այդ ամեն ինչը պարզաբանելու և հանրությանը ներկայացնելու, բայց բացառապես մեր լիազորությունների տիրույթում:
– Բայց, հակառակ ձեր ասածի, ընդդիմությունը՝ մասնավորաբար «Լուսավոր Հայաստանը» ընդդիմությանը հարգանքով վերաբերվելու պահանջ է դնում ձեր առջև:
– Ես չեմ հակադրվում, իհարկե, հարգանքի մթնոլորտ պետք է լինի, բոլորս իրար նկատմամբ հարգանք պետք է ցուցաբերենք: Այսօր քննարկվող հարցի վերաբերյալ «Իմ քայլի» դիրքորոշումն այն է, որ մենք պատրաստակամ ենք և ողջունում ենք Քննիչ հանձնաժողով ստեղծել, բայց բացառապես կառավարման այն օղակում, որը լիազորված է դա անել, այս պարագայում դա ավագանին է: Ես առաջարկում եմ, որ այդ հանձնաժողովը ստեղծվի ավագանու դաշտում, ինչպես պահանջում է օրենքը: Ես այսօր ճեպազրույցի ընթացքում էլ խոստացա, որ եթե հանձնաժողովի ստեղծման համար «Լույս» խմբակցությանը չբավարարի ձայների քանակը, ապա «Իմ քայլի» ներկայացուցիչներին խնդրանքս կլինի ապահովել այդ ձայները, ինչին ի պատասխան՝ ինձ տեղեկացրին, որ եթե «Լույս» խմբակցությունը հայտ ներկայացնի, ձայների խնդիր չկա, միանգամից կստեղծվի Քննիչ հանձնաժողով: «Լուսավոր Հայաստանը» և «Լույսը» որևէ պատճառ չունեն հանձնաժողով չստեղծել հենց ավագանիում: Եթե իրենք կարծում են, որ իրենց թիմն ավագանիում բավարար ներուժ չունի իրականացնելու այդ քննությունը, ապա «Լուսավոր Հայաստան» խմբակցությունը կարող է իր ներուժը նույնպես ներդնել և օգնել գործընկերներին: Իսկ մենք այն կողմն ենք, որը շահագրգիռ է, որ եթե դեռևս հարցեր են մնացել, ամբողջությամբ բացահայտվեն, բայց հանձնաժողովն ստեղծվի այն կառույցում, որը լիազորված է դա անել, և չստեղծվեն վատ նախադեպեր:
– Ինչո՞ւ է ընդդիմությունը ուզում ԱԺ-ում ստեղծել հանձնաժողով և զբաղվել այդ հարցով, ո՞րն է հիմնական դրդապատճառը:
– Կարող եմ տարբեր վարկածներ ներկայացնել՝ տարբեր տեսանկյուններից, բայց ճիշտ կլինի զերծ մնամ:
– Նույն պահանջը ունի նաև ԲՀԿ-ն:
– «Լուսավոր Հայաստանը» բավարար չափով ձայներ չուներ, ԲՀԿ-ն տրամադրել է: Վարկածներից զերծ կմնամ, քանի որ շատ լարված մթնոլորտ է, չէի ուզենա ավելացնել ԼՀԿ-ի լարվածությունը: Ե՛վ խնդրահարույց, և՛ ոչ խնդրահարույց իրավիճակներում միշտ լավագույն լուծումը տալիս է օրենքը: Իհարկե, քաղաքական նպատակահարմարությունը չի կարող վեր դասվել օրենքից… Մի կողմից՝ իրավունքի ուժով ԱԺ-ում կարող է ստեղծվել Քննիչ հանձնաժողով, սակայն ՏԻՄ-երին սահմանադրական փոփոխությունների արդյունքում տրվել են բավականին մեծ լիազորություններ՝ ուժեղացնելու ՏԻՄ ինստիտուտը, ինչը մեզ հնարավորություն չի տալիս վերահսկողություն սահմանել ՏԻՄ-երի նկատմամբ, իսկ Քննիչ հանձնաժողովը վերահսկողական գործիք է, որը որևէ կերպ չի կարող գործել: Պետք չէ թերագնահատել ավագանու ինստիտուտը:
– …Հարգելի՛ Մակունց, մեծ հաշվով կա՞ ընդդիմության լայն ճակատ, ի՞նչ եք կարծում: Մեկ օր առաջ «Իմ քայլի» բանավեճը ԲՀԿ-ի հետ էր, այսօր՝ «Լուսավոր Հայաստանի» հետ, փոխանցումավազքի է նման: Հասկանալի է, որ ընդդիմությունը պետք է զբաղվի իշխանությանը քննադատելով և բանավեճով, բայց տրամաբանությունը մի փոքր այլ բան է հուշում: Դո՞ւք ինչ եք մտածում:
– Նախ տարվա առաջին քառօրյան է, հնարավոր է դա էլ է դեր խաղում, արձակուրդից հետո թարմ ուժերով ենք սկսել քառօրյան: Բայց ուրիշ բանի մասին եմ ցանկանում խոսել: 2019թ. ձևավորված ԱԺ-ի քաղաքական մեծամասնությունն այնպիսին չէ, ինչպիսին նախկինում է եղել, հետևաբար քաղաքական մեծամասնության նկատմամբ վերաբերմունքը նույնպես չի կարող լինել այնպիսին, ինչպիսին եղել է. նախկին մոտեցումները չեն բերում այն անհրաժեշտ նշաձողին, որ պետք է այսօր ունենա խորհրդարանը:
– Լենա Նազարյանի ձևակերպմամբ՝ «Լուսավոր Հայաստանն» ուղղակի խցանվել է անցյալում:
– Ես կարծում եմ, որ ընդդիմությունը շատ ավելի հեղափոխական պետք է լինի, քան այն թիմը, որը հեղափոխության արդյունքում եկել է իշխանության: Դա լինելու է ի շահ ՀՀ-ի և հենց այն քաղաքական թիմի, որը սահմանելու է նշաձողերը: Ի վերջո, մենք պետք է ունենանք բովանդակային քննարկումներ և այլընտրանքային տեսակետների բախում: Դա հենց այն է, ինչ պետք է տեսնենք ԱԺ-ում:
– Պետք է, բայց չենք տեսնում. խնդիրը դա է:
– Փորձենք լավատես լինել:
Հարցազրույցն ամբողջությամբ տեսանյութում:
