HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Դիանա Ղազարյան

Դաշնակցությունը հաստատեց՝ կքվեարկեն Նիկոլ Փաշինյանի օգտին

«Հայ Յեղափոխական Դաշնակցություն» խմբակցության ղեկավար Արմեն Ռուստամյանը Ազգային ժողովում, անդրադառնալով վարչապետի ընտրության՝ խմբակցությունների դիրքորոշումներին, նշեց, որ իրենց խմբակցությունը քվեարկելու է ԱԺ պատգամավոր Նիկոլ Փաշինյանի օգտին։

Իսկ անդրադառնալով իրենց խմբակցության քարտուղար Աղվան Վարդանյանի այն հայտարարությանը, որ վարչապետի թեկնածու Նիկոլ Փաշինյանի քվեարկությանը չի մասնակցելու, չնայած այն հանգամանքին, որ ՀՅԴ կուսակցությունը և խմբակցությունն ունեն որոշում, և եթե կուսակցությունը որոշի՝ պատրաստ է անգամ վայր դնել մանդատը, ասաց. «Ես ստիպված եմ անդրադառնալ Աղվան Վարդանյանի հայտարարությանը, որը իր իսկ խմբակցության համար անակնկալ էր։ Մենք իհարկե հարգում ենք պատգամավորի սահմանադրական իրավունքը, որ նա կարող է քվեարկել իր խղճով և համոզմունքով, բայց սա դաշնակցություն է և ունի իր ավանդույթները։ Նրա կատարած քայլը այդ ավանդույթներին դեմ էր, և մենք բնականաբար այդ պահվածքին անպայման համապատասխան գնահատական կտանք։ Իսկ Դաշակցության դիրքորոշումը նույնն է և անփոփոխ է՝ մենք որոշել ենք և այսօր քվեարկելու ենք հօգուտ Նիկոլ Փաշինյանի»,- նշեց պատգամավորը։

Ռուստամյանի խոսքով՝ իրենց այս դիրքորոշման նպատակը հստակ է՝ հասնել այնպիսի հանգուցալուծման, որից կշահի ողջ ժողովուրդը՝ Հայաստանում, Արցախում և Սփյուռքում։ Նրա գնահատմամբ՝ ժողովրդի և քաղաքական ուժերի հասունության և իմաստնության փորձությունն է այս գործընթացը։

Խմբակցության ղեկավարի գնահատմամբ՝ Սերժ Սարգսյանը իր հրաժարականով ապացուցեց, որ վարչապետի պաշտոնը զբաղեցնելը նեղ հատվածական շահ չէր հետապնդում, հիմա հերթը ՀՀԿ-ին է, որը պետք է ապացուցի, որ նեղ կուսակցական շահ չի հետապնդում և պատրաստ է գնալ խաղաղ հանգուցալուծման ճանապարհով։

«Մենք պարտավոր ենք անցյալի սխալները չկրկնելով՝ թույլ չտալ, որ համաժողովրդական զարթոնքի ներուժը մսխվի, ժողովուրդը հիասթափվի, այլ անենք ամեն ինչ, որ բոլորը` ամեն մի քաղաքացի զգա ժողովրդական շարժման նոր շունչը, ու ճաշակի դրա բարերար արդյունքները»,- նշեց նա։

Հավելենք, որ ՀՅԴ Հայաստանի Գերագույն Մարմինը պահանջում է Աղվան Վարդանյանից վաղաժամ վայր դնել պատգամավորական մանդատը։ ՀՅԴ-ն հաղորդագրություն է տարածել՝ հայտնելով․ «ՀՀ ազգային ժողովում ԱԺ ՀՅԴ խմբակցության պատգամավոր Աղվան Վարդանյանի հնչեցրած տեսակետը անձնական որոշում է և չի համապատասխանում Հ.Յ. Դաշնակցության պաշտոնական դիրքորոշմանը»:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter