Ռուսաստանի և Ադրբեջանի նախագահների միջև ապրիլի 2ին տեղի է ունեցել հեռախոսազրույց, որի ընթացքում Ալիևը Պուտինին ներկայացրել է Վիեննայում Նիկոլ Փաշինյանի հետ հանդիպման իր գնահատականը, ինչպես հայտնում է Կրեմլի մամուլի ծառայությունը: Թե ինչով է տարբերվել Ալիևի գնահատականը հայկական կողմի գնահատականից, հնարավոր է թերևս կռահել նույն օրը Ալիևի արած այլ հայտարարությունից, այն մասին, թե Հայաստանի հետ պատերազմը դեռ չի ավարտվել, ավարտվել է միայն առաջին փուլը:
Ինչ նկատի ունի Ալիևը. թեմայի շուրջ «Առաջին լրատվական»-ի հետ զրույցում, անդրադառնալով այս և մի շարք այլ հարցերի, քաղաքագետ Լևոն Շիրինյանը նշեց. «Թավշյա հեղափոխությունից ի վեր Հայաստանը վարում է մեր ազգային շահերին համապատասխան քաղաքականություն, Արցախի հարցում այն շտկումները, որ կան, արտաքուստ մանրուք են թվում, բայց խորքային են, և բանակցային գործընթացն ամբողջովին դուրս են բերում Ադրբեջանի հույսերի շրջանակից: Պարզ է, որ նա պիտի դիմի իր մերձավոր դաշնակցին, որը տվյալ պարագայում Ռուսաստանն է, և իր դժգոհությունը հայտնի: Ռուսաստանի համար ջութակի առաջին լարը միշտ Ադրբջանն է եղել: Ադրբեջանը պիտի փորձի Հայաստանին ներկայացնել ծուռ հայելու տակ»:
Անդրադառնալով պաշտպանության նախարար Դավիթ Տոնոյանի նյույորքյան հայտարարությանը՝ «նոր պատերազմ, նոր տարածքներ»՝ քաղաքագետը նշեց, որ խոսքն այն մասին է, որ Հայաստանը դուրս է գալիս ճորտությունից, Կրեմլի կամակատար լինելուց, և որ նախկին բանաձևը չի աշխատելու. «Դրանից, իհարկե, նրանք պետք է դժգոհ լինեին: Եվ մեր 5-րդ շարասյունը լռություն է պահպանում, և այդ ամենը անհանգստություն է պատճառում Ալիևին: Բայց հիմա Ռուսաստանն այն վիճակում չէ, որ «նեղի» Հայաստանին»:
Մանրամասն՝ տեսանյութում: