Այս տարի ոստիկանության 456 ծառայող կարգապահական տույժի է ենթարկվել
Այս տարվա առաջին կիսամյակում նվազել են սպանության, սպանության փորձի, դիտավորությամբ առողջությանը վնաս պատճառելու, բնակարանային գողության, խուլիգանության, մահվան ելքով ճանապարհային երթևեկության կանոնները խախտելու դեպքերը: Դրան զուգահեռ՝ թվարկված բոլոր հանցատեսակներով բացահայտման ցուցանիշներն էականորեն աճել են: ՀՀ ոստիկանության կոլեգիայի նիստում իր զեկույցում նշել է ոստիկանության պետի առաջին տեղակալ, ոստիկանության գեներալ-լեյտենանտ Հունան Պողոսյանը:
Ոստիկանության լրատվական ծառայության հաղորդմամբ, նախօրեին տեղի է ունեցել ՀՀ ոստիկանության կոլեգիայի նիստը, որի ընթացքում ամփոփվել են ոստիկանության ծառայությունների և տարածքային մարմինների 2017 թ. 1-ին կիսամյակի օպերատիվ-ծառայողական գործունեության արդյունքները: Նիստը վարել է ոստիկանության պետ, ոստիկանության գեներալ-գնդապետ Վլադիմիր Գասպարյանը:
Հ. Պողոսյանի ներկայացրած զեկույցի համաձայն, հանցագործությունների բացահայտման արդյունավետությունն աճել է 8,0%-ով: Դրա հետ մեկտեղ, աճել է նախկին տարիներին կասեցված քրեական գործերով հանցագործությունների բացահայտման աշխատանքների արդյունավետությունը, ընդ որում՝ 43,7%-ով՝ հանցագործություն կատարած անձի ինքնությունը պարզված չլինելու պատճառաբանությամբ կասեցված քրեական գործերով բացահայտված հանցագործությունների թիվը:
35,5%-ով աճել է կոռուպցիոն բնույթի հանցագործությունների բացահայտման թիվը, դրանց 33,9%-ն ի հայտ է բերվել ոստիկանության մարմինների կողմից: Կոռուպցիոն բնույթի հանցագործություններից 66-ը կաշառակերության դեպքեր են, որոնցից 44-ը հայտնաբերվել է ոստիկանության կողմից:
Հետախուզվողների հայտնաբերման աշխատանքների վերաբերյալ նշվեց, որ հայտնաբերվել է 920 հետախուզվող՝ նախորդ տարվա նույն ժամանակահատվածի 818-ի դիմաց, որոնցից 348-ը՝ ՀՀ քրեական օրենսգրքի 327 հոդվածի հատկանիշներով, իսկ 572-ը՝ առանձնապես ծանր, ծանր և այլ հանցագործություններ կատարելու համար:
Հաշվետու տարում, ոստիկանության հետաքննության մարմինների կողմից նախապատրաստվել է 74766 նյութ, հարուցվել է 3033 քրեական գործ:
Ոստիկանության ուժերով հասարակական կարգի պահպանություն և հասարակական անվտանգություն է ապահովվել ՀՀ Ազգային ժողովի, Երևանի ավագանու ընտրությունների և 3223 զանգվածային այլ միջոցառումների ընթացքում:
Հանրապետության տարածքում արձանագրվել է ճանապարհատրանսպորտային 1499 պատահար, զոհերի թիվը նվազել է 6-ով:
Հաշվետու ժամանակահատվածում ոստիկանության ծառայողների նկատմամբ կատարվել է 737 ծառայողական քննություն, ինչի արդյունքում կարգապահական տույժի է ենթարկվել 456 ծառայող:
Վլադիմիր Գասպարյանը որպես աշխատանքի գերակա ուղղություններից մեկը դիտարկելով անօրինական թմրաշրջանառության դեմ պայքարը՝ առանձնացրել է հատկապես սինթետիկ թմրանյութերի խնդիրը: Ոստիկանության պետը տարածքային ստորաբաժանումների ղեկավարների ուշադրությունը հրավիրել է նաև ապօրինի անտառահատումների դեմ պայքարի արդյունավետության բարձրացման անհրաժեշտությանը:
Խոսելով հետաքննության ծառայության որակական փոփոխության մասին՝ Վլադիմիր Գասպարյանը նշել է, որ ստորաբաժանումների ղեկավարները պետք է լիարժեք օգտագործեն իրենց կարգավիճակը:
Անդրադարձ է արվել նաև հանրության հետ անմիջական շփման ամենամեծ մակերես ունեցող ստորաբաժանումների՝ Ոստիկանության զորքերի և Ճանապարհային ոստիկանության աշխատանքին:
Վլադիմիր Գասպարյանը բարձր է գնահատել Զորքերի գործունեությունը, իսկ Ճանապարհային ոստիկանության խնդիրները վերլուծելով՝ կարևորել է քաղաքացու հետ աշխատանքի որակական փոփոխության անհրաժեշտությունը:
Անդրադառնալով Համայնքային ոստիկանության աշխատանքի առանձնահատկություններին ու խնդիրներին՝ Վլադիմիր Գասպարյանը նկատել է, որ համայնքային ոստիկանի ուշադրության կենտրոնում պետք է լինի նաև հանրության սոցիալական խնդիրների հայտնաբերումն ու լուծմանն աջակցելը՝ համագործակցելով բնակչության ու համապատասխան գերատեսչությունների հետ:
Կոլեգիայի նիստում զեկույցներով հանդես են եկել ոստիկանության մարզային վարչության պետերը:
Ամփոփելով նիստը՝ Վլադիմիր Գասպարյանն ընդհանուր առմամբ դրական է գնահատել ծառայությունների և տարածքային մարմինների օպերատիվ-ծառայողական գործունեության արդյունքները:
Նիստի ավարտին արվել են մի շարք կադրային փոփոխություններ և տրվել կոնկրետ ցուցումներ ու հանձնարարականներ: