Հայաստանի զարգացման հիմնադրամը ՄԱԿ Զարգացման ծրագրի հետ համատեղ օտարերկրյա ներդրողների ներգրավման եւ համագործակցության էլեկտրոնային գործիք է ներմուծում, որի շնորհանդեսը կայացել է դեկտեմբերի 8-ին Տնտեսական զարգացման եւ ներդրումների նախարարությունում։ Առեւտրի եւ զարգացման ՄԱԿ գիտաժողովի Regulations գործիքն ուղղված է կոնկրետ երկրի գործնական միջավայրի մասին տեղեկության ամփոփմանը։
Ներկայացնելով նախագիծը՝ Հիմնադրամի գործադիր տնօրեն Արմեն Ավագյանը նշեց, որ Regulations–ը հնարավորություն կտա օպտիմալացնել բիզնես ընթացակարգերը եւ կրճատել կոռուպցիոն ռիսկերը։ «Գործիքն իրենից ներկայացնում է վեբ կայք, որում լիարժեք տեղեկություն է հավաքված Հայաստանում ներդրումային գործընթացների եւ այն խոչընդոտների մասին, որոնց բախվում են գործարարներն իրենց գործունեության ժամանակ։ Այս նախագծի նպատակն է բարելավել ներդրումային մթնոլորտը Հայաստանում եւ ավելի շատ օտարերկրյա գործարարների ներգրավել»,– նշել է նա։
Գործիքը կներդրվի 21 ամիս անց։ Այս ժամանակահատվածում նախատեսվում է Հայաստանի գործնական միջավայրում հետազոտություններ անցկացնել, ակտիվորեն համագործակցել եւ հանդիպումներ ունենալ այդ միջավայրի ներկայացուցիչների հետ։ Նախագիծն իրականացվում է էլեկտրոնային կառավարման շրջանակում որպես արտասահմանյան ներդրումների խթանման գործիք։ Ընդհանուր բյուջեն կազմում է 320 հազար եվրո։ Ֆինանսավորումն իրականացնում է Միջազգային զարգացման ավստրալական գործակալությունը։ Համապատասխան պայմանագիրը ստորագրել են ՄԱԿ զարգացման ծրագրի ու Միջազգային զարգացման ավստրալական գործակալության ներկայացուցիչները։ Regulations գործիքը բարեհաջող կերպով գործարկել են 30 երկրներում։