Բարձր եմ գնահատում այն քաղաքական ուժի, քաղաքական գործիչների աննախադեպ գործողությունները, որոնք կարողացան ժողովրդին իրենց հետևից տանել, և այդ զարթոնքը Հայաստանում տեղի ունեցավ, ժողովուրդն իր կամքը թելադրեց: Նրանց գործողություններն օրինակելի են: Այս մասին «Առաջին լրատվական»- ի հետ զրույցում ասաց Պաշտպանության նախկին նախարար Սեյրան Օհանյանը՝ հավելելով, որ բավականին լուրջ աշխատանք է կատարվել՝ օրինականության պահպանմամբ:
ՆՐա խոսքով՝ երկարատև ճգնաժամը քաղաքական գործիչներին հասցրել էր հիասթափության… Բայց դա երկար չէր կարող տևել. «Բարոյական, սոցիալական ճգնաժամը իր հանգուցալուծումը պետք է ստանար: Պտտվեց թափանիվը, և Նիկոլ Փաշինյանն իր քաղաքական թիմի հետ կարողացավ վստահություն ձեռք բերել ժողովրդի մոտ: Այդ ամենը հաջողվեց ոչ միայն քաղաքական գործիչների, այլ ամբողջ ժողովրդի գործունեության արդյունքում»:
Անդրադառնալով Փաշինյան-Պուտին հանդիպմանը, Օհանյանը ներկայացրեց իր դիտարկումները այն մասին, թե որքանով այս հանդիպումը շահեկան կլինի Հայաստանի համար:
«Շարժման առաջնորդները և ամբողջ ժողովուրդն ասացին, որ այս շարժման մեջ արտաքին կոմպոնենտ չկա, այդ հաշվի առնելով՝ և՛ ՌԴ-ն, և՛ շատ դերակատարներ բավականին հավասարակշռված վերաբերմունք ցուցաբերեցին այս շարժմանը և հաղթողներին, և Փաշինյան-Պուտին հանդիպման ժամանակ դա ակնհայտ երևաց. բավականին հարգանքով ընդունեցին մեր վարչապետին:
Կարծում եմ Փաշինյան-Պուտին հանդիպումը հնարավորություն կտա, որ հետագայում մեր հարաբերությունները զարգանան»,- ընդգծեց Ս.Օահանյանը:
Նա նաև հավելեց, ՀՀ-ն և ՌԴ-ն ռազմատեխնիկական համագործակցության համաձայնագիր ունեն, որը զարգացում է ապահովում՝ մեզ հնարավորություն տալով ՌԴ-ից և ՀԱՊԿ երկրներից արտոնյալ պայմաններով վարկ ձեռք բերել, նրանց հետ համատեղ ձեռնարկություններ ձևավորել, ռազմատեխնիկական որոշակի միջոցներ ձեռք բերել: «Այդ ամենը, կարծում եմ, Նիկոլ Փաշինյանի ղեկավարությամբ ավելի լավ ընթացք է ստանալու, որովհետև ներքին ամրությունը հնարավորություն է տալու նաև արտաքին քաղքականության մեջ բավականին նախաձեռնողական քաղաքականություն վարել,- նշեց Պաշտպանության նախկին նախարարը:-
Այս իրողության մեջ Նիկոլ Փաշինյանը ճիշտ դիվանագիտությամբ և նաև ճիշտ բանակցությունների շրջանակներում կարող է մեր շահերն ավելի լավ արտահայտել և ամեն ինչ մեր օգտին կլինի»:
Մանրամասն՝ տեսանյութում:
