Արդեն տեղեկացրել ենք, որ Երևանի ընդհանուր իրավասության դատարանի Ավան– Նոր Նորքի նստավայրում մեկնարկել է Հայաստանի երկրորդ նախագահ Ռոբերտ Քոչարյանի, պաշտպանության նախկին նախարար Սեյրան Օհանյանի, Զինված ուժերի գլխավոր շտաբի նախկին պետ Յուրի Խաչատուրովի, 2008-ին Հայաստանի նախագահի աշխատակազմի ղեկավար, Անվտանգության խորհրդի քարտուղար Արմեն Գևորգյանի նկատմամբ քրեական գործով դատական առաջին նիստը։Ամբաստանյալներից դատարանում ներկա է միայն Ռոբերտ Քոչարյանը, որի մուտքը ներկաները ծափերով են ողջունել։Իսկ երբ դատական նիստը 40 րոպեով ընդմիջվել է և դատարանը ժամանակ է տվել պաշտպանության կողմին՝ դատարանին գրավոր կերպով ինքնաբացարկի միջնորդություն ներկայացնելու համար, Ռոբերտ Քոչարյանը ողջունել է դահլիճում՝ ապակուց այն կողմ գտնվող աջակիցներին:
Նշենք, որ լարված է մթնոլորտը ոչ միայն դատարանի նիստերի դահլիճում, այլ նաև բակում:
Տեղեկացրել ենք՝ Ռոբերտ Քոչարյանի աջակիցների և քաղաքացիական ակտիվիստ Վարդգես Գասպարիի միջև տեղի ունեցած միջադեպի մասին
Դատարանի շենքի առաջ հավաքվում են նաև Ռոբեևտ Քոչարյանի դեմ արտահայտվողները: Նրանցից Ջիվան Աբրահամյանը, որ հայտնի է Մանվել Գրիգորյանի դեմ ակցիաներով, Էջմիածնից է եկել ու ֆեյսբուքյան «լայվի» միջոցով բոլորին հրավիրել է Երևանի ընդհանուր իրավասության դատարանի Ավան– Նոր Նորքի նստավայրի դիմաց, որպեսզի ապացուցեն, որ Քոչարյանի կողմնակիցները չեն երկրի տերը:
