Մայիսի 19-ին Արցախի Հանրապետության արտաքին գործերի նախարար Մասիս Մայիլյանը հանդիպել է աշխատանքային այցով Ստեփանակերտ ժամանած Հայաստանի Հանրապետության արտաքին գործերի նախարար Զոհրաբ Մնացականյանի հետ։
Հանդիպման ընթացքում Արցախի եւ Հայաստանի արտաքին գործերի նախարարները քննարկել են երկու հայկական պետությունների արտաքին քաղաքական օրակարգի գերակա ուղղությունները, ինչպես նաեւ փոխադարձ հետաքրքրություն ներկայացնող հարցեր: Տեղի է ունեցել կարծիքների փոխանակում՝ Արցախի միջազգային ճանաչման գործընթացում դրական դինամիկայի ամրապնդման, ինչպես նաեւ Արցախի լիարժեք մասնակցությամբ բանակցությունների եռակողմ ձեւաչափի վերականգնման հեռանկարների շուրջ:
Մասիս Մայիլյանը եւ Զոհրաբ Մնացականյանը ընդգծել են համահայկական նշանակության հարցերի շուրջ համակարգված աշխատանքների կարեւորությունը: Այս համատեքստում կողմերը գոհունակություն են հայտնել գերատեսչությունների միջեւ համագործակցության ներկայիս մակարդակի կապակցությամբ` նշելով արտաքին քաղաքական նպատակների արդյունավետ իրականացման համար երկու նախարարությունների ղեկավարների եւ համապատասխան ստորաբաժանումների միջեւ խորհրդակցությունների պարբերաբար անցկացման անհրաժեշտությունը:
Այնուհետեւ հանդիպումը շարունակվել է ընդլայնված կազմով՝ Արցախի ԱԳՆ կենտրոնական ապարատի ղեկավար կազմի եւ ՀՀ ԱԳՆ ներկայացուցիչների մասնակցությամբ։