Հայկական կերպարվեստի ցուցահանդեսը Դուբայում հաջողություն է վայելել
ԵՐԵՎԱՆ, 20 ԱՊՐԻԼԻ, ԱՐՄԵՆՊՐԵՍ: Երևանյան «Գալա Արտ» ցուցասրահի տնօրինության նախաձեռնությամբ Արաբական Միացյալ Էմիրությունների Դուբայ քաղաքի հեղինակավոր ցուցասրահներից մեկում երկու ամիս շարունակ ներկայացվել է հայ արդի կերպարվեստը: Ցուցադրվել է 21 արվեստագետի ավելի քան 150 աշխատանք: Ցուցահանդեսն ավելի քան 5000 այցելու է ունեցել: Այս մասին «Արմենպրես»-ի թղթակիցը զրուցել է «Գալա Արտ»-ի հիմնադիր փոխտնօրեն Նուշիկ Միքայելյանի հետ:
«Դուբայը Միջին Արևելքում արվեստի խոշոր հարթակի է վերածվում: Դա է պատճառը, որ այնտեղի արվեստի և դիզայնի լավագույն կենտրոններից մեկում` «D3 Dubai» (Եռաչափ Դուբայ) ցուցասրահում, երեք ցուցահանդես կազմակերպեցինք: Ներկայացվեցին հայ ժամանակակից ստեղծագործողների գեղանկարներ, քանդակներ, կոլաժներ, ինստալացիաներ և այլ ժանրերի գործեր: Մեր նպատակն օտարներին հայ կերպարվեստի առանձնահատկություններին ծանոթացնելն էր»,-ասաց Միքայելյանը:
Ցուցահանդեսին անդրադարձել են մի շարք արաբական լրատվամիջոցներ: «THE GULF NEWS» օրաթերթում ասվում է. «Հայկական ժամանակակից կերպարվեստի անզուգական նմուշները Դուբայում մեծ ուշադրության են արժանանում»: «AL ARABIYA» հեռուստակայանը նույնպես չի շրջանցել ցուցահանդեսը` ուղիղ եթերում խոսք տրամադրելով Նուշիկ Միքայելյանին: Վերջինս արաբերենով ներկայացրել է հայկական կերպարվեստի ցուցահանդեսների շարքը:
Սիրիացի հայտնի գրող, «Al ITTIHAD» արաբական թերթի լրագրող Ղալյա Խոջան հոդված է գրել ցուցահանդեսների մասին` խոսելով նաև «Հայ մարդը և նրա պատմությունը, հայոց պատմության ազդեցությունը հայկական կերպարվեստի վրա» թեմայի շուրջ:
Նուշիկ Միքայելյանն ընդգծեց, որ Դուբայում որոշ ցուցասրահներ հայ արվեստագետներից մի քանիսի գործերի նկատմամբ մեծ հետաքրքրություն են ցուցաբերել, և այժմ բանակցություններ են ընթանում այդ ստեղծագործություններն իրենց մոտ ներկայացնելու համար: Առաջարկներ են եղել նաև Քաթարից, Էր Ռիադից:
Ցուցադրված որոշ գործեր վաճառվել են, սակայն Միքայելյանը ևս մեկ անգամ շեշտեց, որ իրենց գերխնդիրը դրանք վաճառելը չէ, այլ միջազգային աճուրդի տներում, միջազգային թանգարաններում հայկական ժամանակակից կերպարվեստը պատշաճ ձևով ներկայացնելը: «Հաճախ համաշխարհային աճուրդի տներում անվանի նկարիչներ Մարտիրոս Սարյանի, Մինաս Ավետիսյանի և այլոց գործերը մատուցվում են ռուսական արվեստի խորագրի ներքո: Մենք ուզում ենք անել ամեն հնարավորը, որ ի վերջո հայկական արվեստ, կերպարվեստ հասկացությունը մտնի միջազգային շուկա»,-խոստովանեց փոխտնօրենը:
«Գալա Արտ» ցուցասրահը հիմնադրվել է 2012 թվականին Երևանում: Հիմնադիր տնօրեններն են ամուսիններ Ավետիս Բերբերյանը և Նուշիկ Միքայելյանը:
Ցուցասրահի հիմնական նպատակներից է միջազգային արվեստի շուկայում հայկական կերպարվեստի տեղը հաստատել` հայ արվեստագետների աշխատանքներով հանդես գալով լավագույն միջազգային ցուցահանդեսներում։ Գործունեության հիմնական մաս է կազմում նաև երիտասարդ տաղանդավոր արվեստագետների բացահայտումն ու միջազգային ասպարեզում նրանց աշխատանքների տարածումը։
Անժելա Համբարձումյան
Բաժանորդագրվեք մեր ալիքին Telegram-ում