Ժիրայր Սեֆիլյան. «Ձեր պաշտպաններին պահեք ձեզ» (տեսանյութ)
«100-ամյակն առանց ռեժիմի» շարժման առաջնորդ Ժիրայր Սեֆիլյանի եւ մյուսների գործով դատական նիստն սկսվում է երկու ամբաստանյալներով: 7 ամբաստանյալներից 5-ը դատարանի նկատմամբ անհարգալից վերաբերմունք դրսեւորելու՝ ոտքի չկանգնելու համար հեռացված են նիստերի դահլիճից: Ամբաստանյալներից Սասունիկ Կիրակոսյանից դատավորը հետաքրքրվեց, ինչու ոտքի չի կանգնում «Նախորդ դատական նիստին դատավորը թույլատրեց ձեզ նստած հանդես գալ, քանի որ երկու անգամ ձեզ համար «Շտապ օգնություն» էր եկել: Ինչն է պատճառը, որ այս նիստին ոտքի չեք կանգնում: «Ինչպես մնացած տղաները»,- ասաց Սասունիկ Կիրակոսյանը: «Այսինքն՝ դատարանը արձանագրի՞,որ ձեր ոտքի կանգնելը պայմանավորված չէր ձեր առողջական վիճակով»,- հարցրեց դատավորը: Սասունիկ Կիրակոսյանը պատասխանեց: «Իհարկե ոչ»: Դատավորը նախազգուշացում կիրառեց Սասունիկ Կիրակոսյանի նկատմամբ, այնուհետեւ հեռացրեց նիստերի դահլիճից: «Այս եւ մյուս այսպիսի հնչեղ գործերով մեկ սկզբունք է առաջացել, հարգանք ոտքի կանգնելու միջոցով: Արդարադատության մնացած բաղադրիչները ընդհանրապես կարեւոր չեն»,- ասաց պաշտպան Արայիկ Պապիկյանը: Դատարանում ցանկացավ հայտարարությամբ հանդես գալ 10 ժամով նիստերի դահլիճից հեռացված Ներսես Պողոսյանի պաշտպանը: Դատավոր Տաթեւիկ Գրիգորյանն ամեն կերպ փորձում էր նրան սահմանափակել: «Տպավորությունն այն է, որ դատավորը միայն պաշտպանների եւ ամբաստանյալների նկատմամբ սանկցիա կիրառելու համար է նկատողություն անում: Դուք մեզ զրկում եք մեր իրավունքներից եւ հարգանք եք խնդրում»,- ասաց Արայիկ Պապիկյանը: Նա դատավորին հիշեցրեց, որ իր պաշտպանյալը չի լիազորել առանց իրեն որեւէ նիստի մասնակցել: Դատավորը զգուշացրեց, որ եթե Արայիկ Պապիկյանը լքի նիստերի դահլիճը, ապա դատավորը կարող է արձանագրել, որ նա 3 անգամ անընդմեջ չի ներկայացել դատական նիստին. «Կարծում եմ, որ դրա իրավական հետեւանքները պատկերացնում եք»,- նախազգուշացրեց դատավոր Տաթեւիկ Գրիգորյանը: Այնուամենայնիվ Արայիկ Պապիկյանը լքեց նիստերի դահլիճը, իսկ դատավորը որոշեց դիմել փաստաբանների պալատ՝ կարգապահական պատաասխանատվության ենթարկելու համար: Նիստին չներկայացած Տիգրան Հայրապետյանի հարցով էլ որոշեց դիմել Փաստաբանների պալատ: Ընդմիջումից հետո առանձին-առանձին նիստերի դահլիճ բերվեցին Ժիրայր Սեֆիլյանը, Գեւորգ Սաֆարյանը եւ Ներսես Պողոսյանը: Դատավորը նրանցից հետաքրքրվեց՝ արդյոք ցանկանո՞ւմ են այլ պաշտպաններ ներգրավել, կամ դատարանը կարող է հանրային պաշտպան տրամադրել: Դատավորի խոսքերով՝ նրանց պաշտպանները երեք-չորս անգամ չեն ներկայացել նիստերին: Ժիրայր Սեֆիլյանը, Ներսես Պողոսյանը եւ Գեւորգ Սաֆարյանը հայտարարեցին, որ չեն հրաժարվում իրենց պաշտպաններից: «Ձեր պաշտպաններին պահեք ձեզ»,- ասաց Ժիրայր Սեֆիլյանը:
