Հեղափոխությունները միշտ էլ սկսում են իշխանափոխությունից: Այդ մասին «Առաջին լրատվական»-ի հետ զրույցում նշել է մշակութային մարդաբան Աղասի Թադևոսյանը:
Հարցին, թե տեղի ունեցածը հեղափոխություն է, թե սոսկ իշխանափոխությունը, նա արձագանքեց. «Տեղի է ունեցել իշխանափոխություն՝ հեղափոխական նպատակադրումներով: Այդ նպատակադրումները նկատելի են արդեն իշխանությունը փոխելու պրոցեսում: Մեր իշխանությունը օլիգարխիկ համակարգի իշխանություն էր և բացառապես ուղղված էր հասարակության այլ խավերին հարկադիր ենթակայական վիճակում պահելուն: Իրենք ձևավորել էին հարկադրանքի գործիքներ՝ ոստիկանությունը, նաև բանակը օգտագործելով: Մենք հիշում ենք, որ բանակը 2008-ի մարտի 1-ին օգտագործեցին ներքաղաքական նպատակներով, նաև 1996-ին Վազգեն Սարգսյանը բանակը մտցրեց քաղաքականություն: Այսինքն՝ սա բացառապես շահագործող դասակարգի և անօրինական կարգով արտոնյալություն ձեռք բերած դասակարգի իշխանությունն էր՝ ընդդեմ հասարակության մնացած խավերի»:
Աղասի Թադևոսյանը նկատեց, որ այս շարժման մեջ կար դասակարգային տարր. «Մենք չենք ուզում խոստովանել, որ ԽՍՀՄ փլուզումից և անկախ Հայաստանի 30 տարիներին ձևավորվեց դասակարգային հասարակություն, ձևավորվեցին հարուստներ, շատ փոքրաթիվ միջին խավ և մեծաթիվ աղքատների խավ: Այս իմաստով, շարժումը դասակարգային բնույթ ուներ, թեկուզ թաքնված, որը չէր հռչակվում: Դասակարգային բնույթն այն էր, որ ունեցվածքային ավելի ցածր շերտերում եղած խավերն անհույս վիճակում էին, չէին տեսնում ապրելու հնարավորություն և միացան բողոքի կոչերին»:
Ամբողջությամբ՝ տեսանյութում։
