Սոցկայքերում ակտիվորեն տեսանյութ է տարածվում, որում երևում է, թե ինչպես է արձագանքում Ռուսաստանի վարչապետ Դմիտրի Մեդվեդևը ՀՀ վարչապետ Նիկոլ Փաշինյանի՝ ռուսերեն արտասանված խոսքերին: Փաշինյանի ռուսերենը այդ դրվագում կաղում է, ինչն առաջացնում է Մեդվեդևի հրճվանքը։ Տեսանյութն արվել է Երևանում տեղի ունեցած Եվրասիական միջկառավարական խորհրդի նիստի ժամանակ:
Բոլորը գիտեն, որ Նիկոլ Փաշինյանը մեծ աշխատասիրություն ունի և հետևողականորեն լեզուներ է սովորում և աշխատում է միջազգային հարթակներում ելույթ ունենալ անգլերեն, եվրասիական կառույցներում վարչապետը խոսում է ռուսերեն։ Թեև, եթե անկեղծ լինենք, նման իմպերատիվ կամ բարոյական պարտավորություն օրենքը Փաշինյանի վրա չի դնում, ու նա միայն պարտավոր է ու հրաշալի տիրապետում է հայերենին, էլ չասենք նրա հռետորական տաղանդի ու գրավոր խոսքի ուժի մասին։ Այնուամենյանիվ, Փաշինյանը հարգում է միջազգային կառույցներին ու տարածաշրջանային կազմակերպություններին և անում է ամեն ինչ, որպեսզի իր լսարանը կոմֆորտի մեջ լինի՝ խոսելով համապատասխան լեզուներով։
Սա, սակայն, բնավ չի ենթադրում, որ Փաշինյանը պարտավոր է գրական հայերենի մակարդակով տիրապետել ռուսերենին կամ անգլերենին։
Բանավոր խոսքի մեջ ցանկացածս կարող ենք սայթաքել կամ սխալվել, ու Մեդվեդևի հրճվանքն այս պարագայում միայն խղճահարություն է առաջացնում։ Ռուսական կայսերապաշտական մեծամտությունը չափ ու սահման չունի և օժտված է ցինիզմի մեծ դոզայով։ Հենց դրա արտահայտությունն է Մեդվեդևի հրճվանքը։ Չնայած՝ մենք կարող ենք մեծահոգություն ցուցաբերել, որովհետև ամբողջ աշխարհը ծիծաղում է հենց Մեդվեդևի վրա, որը Պուտինի ստվերից չկարողացավ դուրս գալ անգամ այն ժամանակ, երբ ֆորմալ առումով երկրի առաջին դեմքը՝ նախագահն էր։ Ամբողջ աշխարհը արհամարհական հեգնանքով է վերաբերվում նաև Մեդվեդևի կոռումպացվածությանը, նրա դիզած միլիարդներին։ Սակայն շատ ավելի քստմնելի է, երբ Փաշինյանի խոսքը ծաղրում են Ֆեյսբուքի որոշ օգտատերեր, հատկապես՝ նրանք, ովքեր համակրում են նախկին համակարգին։ Այստեղ արդեն հառնում է անհայրենիք ստորաքարշների խրախճանքի պատկերը։
Նիկոլ Փաշինյանը լեգիտիմության ու վստահության մեծ ռեսուրս ունեցող ղեկավար է ու իրեն ծաղրելու առիթ չի տվել, նա, հաստատապես, երկիրն արտաքին հարաբերություններում շատ ավելի արժանապատիվ է ներկայացնում, քան իր նախորդները։ Փաշինյանին ծաղրող քաղքենիները թերևս մոռացել են, թե ինչպես էր Ռոբերտ Քոչարյանը ՄԱԿ-ի ամբիոնից անգլերեն ելույթ ունենում՝ անգիր արածի պես կարդալով հայատառ գրված տեքստը, կամ չեն հիշում, թե ինչպես էին շատ դեպքերում անհասկանալի մնում Սերժ Սարգսյանի ելույթները՝ անկախ այն հանգամանքից՝ դրանք հայերեն էին թե ռուսերեն։
Պետության վարչապետը լեզվաբան չէ, ու շատ ավելի կարևոր է նրա կառավարման որակը, քան՝ օտար լեզվի փայլուն իմացությունը։ Իսկ քաղքենիներին խորհուրդ եմ տալիս՝ հանգիստ նստել տեղները, որովհետև Փաշինյանն անպայման վարժ կխոսի թե՛ անգլերեն, թե՛ ռուսերեն։
https://www.facebook.com/500476907030721/videos/627205257743295/