Լենա Նազարյանը վստահեցնում է՝ ավագանու իրենց թեկնածու Միքայել Մինասյանի սանիկ Վիկտոր Մնացականյանն ակտիվորեն մասնակցել է հեղափոխությանը
ԵՐԵՎԱՆ, 17 ՕԳՈՍՏՈՍԻ, ԱՐՄԵՆՊՐԵՍ: ՀՀ ազգային ժողովի «Ելք» խմբակցության անդամ Լենա Նազարյանը վստահեցնում է՝ Երևանի ավագանու ընտրություններում «Իմ քայլը» դաշինքի թեկնածու Վիկտոր Մնացականյանն ակտիվ մասնակցել է հեղափոխությանը, բացի այդ հայտնի է Երևանի զարգացման տարբեր ծրագրերով:
«Արմենպրես»-ի հաղորդմամբ՝ Նազարյանն այս մասին ասաց ԱԺ ճեպազրույցներում՝ անդրադառնալով «Ծառուկյան» խմբակցության Երևանի քաղաքապետի թեկնածու Նաիրա Զոհրաբյանի հայտարարությանը, թե «Իմ քայլը» դաշինքի համամասնական ցուցակում են Միքայել Մինասյանի սանիկն ու Սերժ Սարգսյանի բարեկամները:
«Վիկտոր Մնացականյանը հեղափոխության օրերին շատ ակտիվ մասնակցել է ճանապարհ փակելուն, կան նույնիսկ տեսանյութեր: Նա ներգրավված է եղել Աբովյան փողոցը գորգերով փակելու հայտնի ակցիայում: Որքան ես տեղյակ եմ՝ նա Միքայել Մինասյանի սանիկն է եղել շատ վաղուց, քան Մինասյանը դարձել է այն անձը, որին մենք բոլորս գիտենք»,-ասաց Լենա Նազարյանն ու շեշտեց՝ Վիկտոր Մնացականյանը շատ հայտնի է Երևանում տարբեր բարեգործական և զարգացման ծրագրերով:
Պատգամավորը հավաստիացրեց՝ իրենց թեկնածու Մնացականյանն ակտիվորեն մասնակցել է հեղափոխությանը: Որքանով ինքը գիտի՝ Միքայել Մինասյանի հետ հարաբերությունները չեն պահպանվել:
Անդրադառնալով իրենց ցուցակի թեկնածու Միքայել Հասրաթյանին, ասաց՝ նա ոչ մի կապ չունի Միքայել Մինասյանի բարեկամների հետ: «Զոհրաբյանը նշեց մի անձի մասին, ով իբր Զորի Բալայանի բարեկամն է: Մենք պատկերացում չունենք, թե ում մասին է խոսքը»,-նշեց Նազարյանը:
Անդրադառնալով «Ծառուկյան» խմբակցությանը՝ Լենա Նազարյանը հիշեց՝ ապրիլի 17-ին 9 կամավորով կողմ են քվեարկել Սերժ Սարգսյանի վարչապետությանը, ինչպես նաև այդ կուսակցությունը մի քանի անգամ կոալիցիայի մեջ է եղել ՀՀԿ-ի հետ: «Զոհրաբյանը կողմ է քվեարկել նաև 2008-ի մարտի 1-ին արտակարգ դրություն մտցնելու որոշմանը ԱԺ-ում: Նրանք բազմիցս կոալիցիաների մեջ են եղել ՀՀԿ-ի հետ, հետո մեղադրանքներ են ներկայացնում մեզ՝ ՀՀԿ-ի հետ համգործակցության համար»,-ասաց Նազարյանը:
Նրա կարծիքով՝ բոլորս պետք է արձանագրենք Զոհրաբյանի այն ասածը, որ Ռոբերտ Քոչարյանն ու Սերժ Սարգսյանն իրենց համար գոյություն չունեն: Հույս հայտնեց, որ այդ հերթական հայտարարությունը վերջնական է:
Միքայել Մինասյանը ՀՀ 3-րդ նախագահ Սերժ Սարգսյանի դստեր ամուսինն է:
Բաժանորդագրվեք մեր ալիքին Telegram-ում