Կառավարությունում պարգևավճարները բյուջե վերադարձնելու պահանջն անլուրջ են որակում
Կառավարության շենքի դիմաց այսօր մի քանի քաղաքացիներ պահանջում էին բյուջե վերադարձնել պետական մարմինների աշխատակիցներին տրամադրած պարգևավճարների գումարները։
«Վերադարձրեք պարգևավճարները պետբյուջե» գրությամբ ցուցապաստառներով քաղաքացիները հիշեցնում էին, որ պարգևաևվճարների տրամադրումն իրականացվել է նախկին իշխանությունների օրոք գրված օրենքով։
«Եթե պարոն վարչապետը հայտարարում է, որ ամեն ինչ եղել է օրենքի սահմանում, ապա մենք ցանկանում ենք հարց տալ պարոն վարչապետին՝ այդ ո՞ր օրենքով։ Սերժ Սարգսյանի՞։ Սերժ Սարգսյանը վաղուց հեռացել է, բայց համակարգը, օրենքները, որով դուք առաջնորդվում եք, մնացել են նույնը։ Նոր Հայաստանում հին օրենքներով չպետք է առաջնորդվեն։ Մենք գտնում ենք, որ այս գործընթացն անօրինական է ու միլիոնների հասնող պարգևաևվճարները, որ գրպանել են պետական պաշտոնյանները, պետք է վերադարձվեն»,-ասաց ակցիայի կազմակերպիչներից Իրինա Հարությունյանը։
Նա նշում է, որ նախորդ իշխանությունների օրոք մարդկանց բողոքները տեղ չէին հասնում, նույն գործելաոճը որդեգրել է ներկա իշխանությունը։
«Քիչ ենք, ճիշտ է, բայց բողոքող մարդիկ շատ են, մարզերում էլ են մարդիկ բողոքում, այսօր աշխատանքային օր է, մարդիկ չեն կարող գալ։ Բողոքը, կարելի է ասել, համատարած է»,-ասացին նրանք՝ նշելով, որ կառավարությանը ժամանակ կտան պատասխանելու, պատրաստվո՞ւմ են բյուջե վերադարձնել պարգևավճարների գումարները, եթե այո՝ ապա ե՞րբ, եթե ոչ, ապա կհետևի ստորագրահավաք։
«Դրանց հիման վրա մենք հաղորդում կտանք հանցագործության, կոռուպցիայի մասին։ Ինքնապարգևատրում է տեղի ունեցել, դա ավելի շատ նման է յուրացման։ Եթե գումարները չվերադարձվեն, ապա դա կարելի է համարել մասայական թալանի ինչ-որ մի ձև»,-ասացին ակցիայի կազմակերպիչները։
Նրանք համարում են, որ պարգևաևվճարների գումարները կարելի է տրամադրել սահմանը պահող զինվորականներին, բազմազավակ ընտանիքներին։
Երբ ակցիայի մասնակիցները փորձեցին մոտենալ կառավարության դռանը, ոստիկանները պահանջեցին իջնել աստիճաններից։ Ակցիայի մասնակիցներից Իրինա Հարությունյանը հիշեցրեց Փաշինյանի խոսքերը. «Մեզ պարոն վարչապետն ասել է` սա ձեր դուռն է. Կուզեք՝ բացեք, կուզեք՝ փակեք»։
Ոստիկաններն ակցիայի մասնակիցներին ցույց տվեցին ընդունարանի դռան տեղը։
Վարչապետի մամուլի խոսնակ Վլադիմիր Կարապետյանից Panorama.am-ը փորձեց պարզել, արդո՞ք ակցիայի մասնակիցների պահանջի մասին տեղյակ է գործադիր մարմնի ղեկավարը, կամ նրա խորհրդականները։ Եթե տեղյակ են՝ ի՞նչ են որոշել, ընթացք տա՞լ, թե՞ ոչ։
Վ. Կարապետյանը նախ անլուրջ որակեց հարցը, ապա այն մեր կողմից կրկնելուց հետո խոստացավ պարզել ու պատասխանել։
Նշենք, որ Իրավական ակտերի նախագծերի հրապարակման միասնական կայքում փետրվարի 8-ին հրապարակվել է «Հայաստանի Հանրապետության 2019 թվականի պետական բյուջեով պետական իշխանության մարմինների համար նախատեսված պարգևատրման ֆոնդից աշխատողների պարգևատրման միասնական կարգը և պայմանները սահմանելու մասին» Կառավարության որոշման նախագիծը։ Դրա վերաբերյալ առաջարկություններ կարելի է ներկայացնել մինչև փետրվարի 23-ը։
Նախագծի հիմնավորման մեջ նշվում է՝ նախագծի ընդունմամբ ակնկալվում է կանոնակարգել և միասնականացնել պետական մարմիններում քաղաքական, վարչական, ինքնավար, հայեցողական պաշտոններ զբաղեցնող անձանց, պետական ծառայողների, քաղաքացիական աշխատանք կատարող և տեխնիկական սպասարկում իրականացնող անձանց որակյալ աշխատանքի համար, բացակայող աշխատողին փոխարինելու ժամանակահատվածի համար, ինչպես նաև «Քաղաքացիական ծառայության մասին» օրենքով նախատեսված փորձաշրջանը կամ փորձնակի աշխատանքները համակարգող քաղաքացիական ծառայողներին տրվող պարգևատրումների ամբողջական և միասնական կարգավորումներ:
Ավելի ուշ վարչապետի խոսնակն ասաց՝ նման պահանջով գրավոր դիմում ընդունարանում չի եղել։
Լրահոս
Տեսանյութեր
Արդյո՞ք սա սահմանազատում է, թե՞ ճնշման տակ ինչ-որ բան տալ. Սերժ Սարգսյան
