Թուրքական լիրան անկում ապրեց այն բանից հետո, երբ Անկարան ամերկացի քահանա Էնդրյու Բրանսոնի գործի հետ կապված ՆԱՏՕ-ի երկու դաշնակիցների առճակատման ֆոնի վրա Վաշինգթոնին մեղադրեց «տնտեսական պատերազմ սկսելու» համար:
Թուրքիայի նախագահ Ռեջեփ Էրդողանի ներկայացուցիչը հաղորդեց, որ Վաշինգթոնը պետք է հարգի քահանայի դեմ դատավարույթյունը:
Լիրան դոլարի նկատմամբ նվազել է 0.78 տոկոսով՝ մինչեւ 6,0800 երեկվա 6,0330-ի համեմատ:
Ընդհանուր առմամբ, տարեսկզբից լիրան կորցրել է 37 տոկոս, մինչդեռ ԱՄՆ-ի հետ հարաբերություններում ճգնաժամը լրացուցիչ ճնշում է գործադրում առանց այդ էլ թուլացած արժույթի վրա, որը տուժել է նախագահ Թայիփ Էրդողանի՝ դրամավարկային քաղաքականության վրա ազդեցության վերաբերյալ ներդրողների անհանգստություններից:
Տնտեսագետները կարծում են, որ Թուրքիան դեռ պետք է համոզի ներդրողներին, որ պատրաստ է ձեռնարկել միջոցներ, որոնք անհրաժեշտ են տնտեսության ամրապնդման համար:
Էրդողանի մամուլի քարտուղար Իբրահիմ Կալինը Reuters-ին ասել է, որ Սպիտակ տան ազգային անվտանգության հարցերով խորհրդական Ջոն Բոլթոնի մեկնաբանությունները ցույց են տալիս, որ ԱՄՆ-ն նպատակ ունի հարվածել Թուրքիայի տնտեսությանը:
«Բոլթոնն ապացուցել է, որ Թրամփի վարչակազմը ՆԱՏՕ-ի դաշնակցին տնտեսական պատերազմի թիրախ է դարձրել», - ասել է Կալինը: Նրա խոսքով, Վաշինգթոնը մտադիր է «օգտագործել առեւտուրը, սակագները եւ պատժամիջոցները գլոբալ առեւտրային պատերազմ սկսելու համար»:
Գերմանիայի կառավարությունում աղբյուրը հայտնել է, որ Արժույթի միջազգային հիմնադրամը կարող է օգնել Թուրքիային դիմակայել արժութային ճգնաժամին, սակայն Էրդողանի փեսան՝ ֆինանսների նախարար Բերաթ Ալբայրաքը հայտարարել է, որ Անկարան չի պատրաստվում դիմել ԱՄՀ:
Էրդողանի գլխավոր տնտեսական խորհրդատու Ջեմիլ Էրտեմը հաստատել է այս լուրը`ասելով, որ Թուրքիան պետք է խորացնի տնտեսական եւ առեւտրային հարաբերությունները Եվրամիության եւ այլ երկրների հետ:
«Հանգիստ թողեք ԱՄՀ-ը, ԱՄՀ-ի մտածելակերպը չպետք է մտնի մեր դռներից ներս: Եթե դա տեղի ունենա, ապա մենք կբախվենք իրական փլուզման եւ ճգնաժամի հետ», - «Միլիեթ» թերթում գրել է Էրտեմը՝ Թուրքիայի տնտեսության վրա «հարձակումը» զարգացող երկրների համար «ֆանտաստիկ հնարավորություն» նկարագրելով:
