Զարուհի Փոստանջյանի ղեկավարած «Երկիր Ծիրանի» խմբակցությունը պատրաստվում է ավագանու հաջորդ նիստին հանդես գալ նախաձեռնությամբ՝ առաջարկելով Մյասնիկյան արձանի մոտակայքում հուշարձան տեղադրել՝ նվիրված 2008-ի Մարտի 1-ի ողբերգության հետևանքով սպանված 10 զոհի հիշատակին։
Հուշարձան տեղադրելու այդ նախաձեռնությանը ՀՀԿ-ն արդեն դեմ է արտահատվել։ Մշակույթի, կրթության և սոցիալական հարցերի մշտական հանձնաժողովն էլ բացասական եզրակացություն է տվել նախագծին։
Մարտի 1-ի զոհերի հիշատակին նվիրված հուշարձան տեղադրելու նախաձեռնության շուրջ, պարզվում է, կոնսենսուս չկա նաև ավագանու «Ելք» խմբակցությունում։ Մեր տեղեկություններով՝ նախաձեռնությանը կտրականապես դեմ են հատկապես դաշինքի մաս կազմող «Հանրապետություն» կուսակցության անդամները։ Նրանց պնդմամբ՝ նախաձեռնության հիմնավորման մեջ չկան հստակ ձևակերպումներ։ Ավելին, ներկայացված ձևակերպումներով փորձ է արվում նսեմացնել ՀՀ երկրորդ նախագահ Ռոբերտ Քոչարյանի դերն ու մասնակցությունը, մեղսակցությունը Մարտի 1-ի սպանդին։
Ըստ Զարուհի Փոստանջյանի ներկայացրած նախաձեռնության՝ նշվում է. «Հայ ազգը նորանկախ Հայաստանի բռնակալությունից առաջին սարսափելի հարվածը ստացավ 1995-1996 թվականներին, երբ կեղծվեցին ՀՀ Սահմանադրության ընդունման հանրաքվեն, խորհրդարանական և նախագահական ընտրությունների արդյունքները, և հայտարարվեց քաղաքական իշխանության ձևավորման համար այլևս կիրառվելիք հետևյալ բանաձևը․«Եթե ընդդիմությունը նույնիսկ հավաքի 100 տոկոսանոց ձայն, նրան իշխանություն չի տրվելու»:
Այսինքն՝ Զարուհի Փոստանջյանի «Երկիր Ծիրանին» մեղավորության սլաքն ավելի շատ ուղղում են դեպի Լևոն Տեր-Պետրոսյան և Սպարապետ Վազգեն Սարգսյան, քան Ռոբերտ Քոչարյան։ Եվ բնավ պատահական չէ, որ «Երկիր Ծիրանին» այս նախաձեռնությանը զուգահեռ ավագանու նիստ է բերում նաև Վազգեն Սարգսյանի անվան փողոցը Վուդրո Վիլսոնի անվամբ վերանվանելու նախաձեռնությունը։
Եթե ավագանու նիստում քվեարկության ժամանակ «Հանրապետություն» կուսակցության անդամները դեմ քվեարկեն Փոստանջյանի նախաձեռնությանը։
Մեզ հասած տեղեկություններով՝ «Քաղաքացիական պայմանագրի» անդամները հակված են կողմ արտահայտվել Զարուհի Փոստանջյանի նախաձեռնությանը՝ հիմնավորմամբ, որ նախաձեռնությունը վերաբերում է Մարտի 1-ի զոհերին։
Ինչ վերաբերում է «Լուսավոր Հայաստանին», ապա նրանք դեռևս որոշում չունեն։
