Երեկ հայտնի դարձավ, որ 2008-ի՝ 10 մարդու կյանք խլած մարտյան իրադարձությունները քննող ՀՔԾ-ն որոշում է կայացրել որպես մեղադրյալ ներգրավել նախկին Գլխավոր դատախազ Կոստանյանին, որն արդեն երկու ամիս բնակվում և աշխատում է Մոսկվայում։
«Ազատության» հետ հեռախոսազրույցում Կոստանյանն ասել է, որ քննիչին ժամանակին հայտնել է, որ Մոսկվայում աշխատում է, դասընթաց է վարում, և կվերադառնա այն ավարտելուց հետո։ Կոստանյանը նաև ասել է, թե ՀՔԾ-ի դրսևորած «հրատապությունը իր համար կանխատեսելի էր»՝ առանց նշելու սակայն, թե այդ դեպքում ինչու քայլեր չի ձեռնարկել Հայաստանից հեռու չգտնվելու համար․ - «Եվ առնվազն սեմեստրն ավարտվելու հետո, ես ինքս չէ՞ պատրաստակամություն հայտնեցի, որ ներկայանալու եմ: Եվ այս հրատապությունը ինձ համար կանխատեսելի էր, բայց ոչ ողջամիտ և ոչ նորմալ էր իրավական տեսակետից: 48 ժամվա ընթացքում օբյեկտիվորեն հնարավոր չէ ներկայանալ»:
48 ժամում հնարավո՞ր է արդյոք Մոսկվայից հասնել Երևան․ լրագրողների այս հարցին Սասուն Խաչատրյանը հակադարձեց. - «Ես էլ այդ հարցը ձեզ եմ տալիս՝ դուք իրատեսակա՞ն եք համարում 48 ժամվա մեջ Մոսկվայից գալ Երևան»:
ՀՔԾ-ը դեռ չի մանրամասնում, թե ինչ հոդվածներով է որպես մեղադրյալ ներգրավել Կոստանյանին և ինչ խափանման միջոց է ընտրելու։ Սակայն Մարտի 1-ի գործով անցնող մեկ այլ նախկին բարձրաստիճան պաշտոնյայի՝ նախկին ոստիկանապետ Ալիկ Սարգսյանին առաջադրված մեղադրանքի մասին հաղորդագրությունում շոշափվում էր նաև Գևորգ Կոստանյանի անունը։
Ըստ այդմ, 2008-ին Մարդու իրավունքների եվրոպական դատարանում Հայաստանի կառավարության ներկայացուցիչ Գևորգ Կոստանյանը չարաշահել է իր պաշտոնեական լիազորությունները և նպատակ է ունեցել պարտակել 2008 թվականի մարտի 1-ին և 2-ին Երևանում ծավալված իրադարձությունների ժամանակ ոստիկանության իրականացրած անօրինական գործողությունները և Հայաստանի զինված ուժերի օգտագործումը։
Ըստ ՀՔԾ-ի, Կոստանյանը և այն ժամական նախագահի օգնական, իսկ 2008 թվականի հուլիսի 2-ից՝ Ոստիկանության պետի տեղակալ Գևորգ Մհերյանը իրենց հանձնարարություններով ու ցուցումներով պաշտոնատար անձանց դրդել են չարաշահել պաշտոնեական լիազորությունները և կեղծել ապացույցներ:
Շղթայում ներգրավված է եղել նաև նախին ոստիկանապետ Ալիկ Սարգսյանը: Վերջինս Մարտի 1-ի գործով մեղադրյալ է, ստորագրություն է թողել երկրից չհեռանալու մասին:
Այսօր ՀՔԾ պետը չբացեց փակագծերը, թե արդյոք Կոստանյանին առաջադրվելիք մեղադրանքը կապվում է Ալիկ Սարգսյանին արդեն առաջադրված մեղադրանքին, թե՞ այլ հանգամանքներ են ի հայտ եկել:
«Ես հիմա չեմ ցանկանում հատ-հատ ապացույցներին անդրադառնալ: Որպես մեղադրյալ ներգավելու հիմքը այդ ապացույցների համակցությունը բավարար համարելն է», - ասաց Սասուն Միքայելյանը:
«Ազատության» հետ հեռախոսազրույցում նախկին Գլխավոր դատախազը այդպես էլ հստակ չպատասխանեց հարցին, թե դեկտեմբերին, դասերն ավարտելուց հետո վերադառնալո՞ւ է Հայաստան, թե՞ ոչ։
Ուղիղ տրված հարցին Կոստանյանն արձագանքել է․ - «Եթե ես ձեռք եմ բերում պայմանավորվածություն, ավելին՝ ես հայտնում եմ իմ գալու բոլոր վերջնաժամկետները: Սենց հրատապ, 48 ժամ առաջադրելը ինձ համար արհեստականություն է մեխանիկորեն արդեն առաջացնում»:
Մարտի 1-ի 10 զոհերից Գոռ Քլոյանի հայրը՝ Սարգիս Քլոյանը վստահ է, որ Գևորգ Կոստանյանը Հայաստան վերադառնալու մտադրություն չունի և փորձում է մոլորեցնել հանրությանը․ - «Ինքը շատ մեծ դերակատարություն ունի Մարտի 1-ի բոլոր գործերը կոծկելու հարցում: Դրա համար ես իմ կարծիքն եմ հայտնում, որ նա չի գալու: Մոլորեցնում ա, կամ էսօր ուզում ա Ռուսաստանում քաղաքացիություն ձեռք բերի կամ ապաստան խնդրի: Նա չի գալու»:
Մարտի 1-ին սպանված Քլոյանի իրավահաջորդը հույս ունի, որ 48 ժամը լրանալուց հետո իրավապահները հետախուզում կհայտարարեն Կոստանյանի նկատմամբ։
