Արթուր Պետրոսյանը երեկ հրապարակեց ֆուտբոլի Հայաստանի ազգային հավաքականի վերջնական կազմը, որը նախապատրաստվելու է նոյեմբերի 9-ին և 13-ին Վազգեն Սարգսյանի անվան «Հանրապետական» մարզադաշտում կայանալիք Բելառուսի և Կիպրոսի հետ ընկերական հանդիպումներին:
Հավաքականում կան նորեկներ: Մասնավորապես, առաջին անգամ ազգային թիմից հրավեր են ստացել «Արարատի» դարպասապահ Արման Մելիքսեթյանը, «Գանձասար-Կապանի» պաշտպան Հայկ Իշխանյանը և «Փյունիկի» կիսապաշտպան Էրիկ Վարդանյանը: Տևական ընդմիջումից հետո ազգային հավաքական է հրավիրվել նաև «Բանանցի» կիսապաշտպան Ռումյան Հովսեփյանը: Պետրոսյանի վերջնական ցուցակի հրապարակումից հետո տեղական լրատվամիջոցներում եղան հրապարակումներ, որ ՀՀ ազգային հավաքականի մարզիչը գտել է «նոր արյունը» Հայաստանում:
«Մեզ նոր արյուն է պետք: Դրսում հանդես եկող ֆուտբոլիստները՝ Բայրամյանը, մյուսը-մյուսը, կարող են թարմ ուժ հաղորդել: Ֆուտբոլիստը նախ իր վրա պետք է աշխատի: Այս կազմով բարդ կլինի պայքարել անգամ Ազգերի լիգայում: Ունենք շատ տաղանդավոր և երիտասարդ ֆուտբոլիստներ, բայց աճ չի նկատվում նրանց մոտ: Միգուցե բավարարվում են, որ խաղում են Բարձրագույն խմբում կամ մինչև 21 տարեկանների հավաքականում: Կարծում եմ, որ ֆուտբոլիստն է իր աճի համար պատասխանատու: Նրանք պետք է լավ խաղան, աճ գրանցեն, նոր մենք նրանց հրավիրենք հավաքական»,- այսպիսի հայտարարությամբ էր հանդես եկել ֆուտբոլի Հայաստանի ազգային հավաքականի գլխավոր մարզիչ Արթուր Պետրոսյանը աշխարհի առաջնության ընտրական փուլի Լեհաստանի հետ հանդիպումից հետո:
Պետրոսյանի երեկվա ցուցակում արտասահմանում հանդես եկող որևէ նոր ֆուտբոլիստ չկա: Փաստորեն, տեսադաշտում չունենալով արտասահմանում հանդես եկող ֆուտբոլիստներ, որոնք կարող են միանալ հավաքականին, Պետրոսյանը կարծես թե որոշել է ապավինել տեղի կադրերին:
Ինչ խոսք, Մելիքսեթյանի, Վարդանյանի և Իշխանյանի՝ ազգային թիմում հայտնվելը դրական երևույթ պետք է որակել: Հատկապես Իշխանյանը կարող է օգնել սարսափելի վիճակում գտնվող պաշտպանությանը: Այդուհանդերձ, նրանք, ովքեր հետևում են Հայաստանի առաջնությանը, կարծում եմ՝ կհամաձայնեն, որ բացի վերոնշյալ երեք ֆուտբոլիստներից, մեր թիմերում կան էլի մի քանի խաղացողներ, որոնք կարող են օգտակար լինել ազգային հավաքականին: Մասնավորապես, «Ալաշկերտում» հանդես եկող Արթուր Եդիգարյանն ու Արտակ Դաշյանը: Այս ֆուտբոլիստները բավական փորձառու են և առկա ծանր իրավիճակում կարող են կարգավորել խաղը կիսապաշտպանական օղակում: Վերջին խաղերում աչքի է ընկնում նաև «Գանձասար-Կապանի» դարպասապահ Գևորգ Կասպարովը:
Այս ֆուտբոլիստները, սակայն, ազգային հավաքականում չեն այն պարզ պատճառով, որ գտնվում են ֆուտբոլի ֆեդերացիայի նախագահ Ռուբեն Հայրապետյանի սև ցուցակում: Դե բնական է, Արթուր Պետրոսյանը ոչ մի դեպքում չի անի այնպիսի քայլ, որը «շեֆին» դուր չի գա: Եթե Կասպարովին դավաճան անվանելով Հայրապետյանը նրա մուտքը արգելել էր ազգային հավաքական, ապա Եդիգարյանի և Դաշյանի մասին մամուլի ասուլիսների ժամանակ հեգնական տոնով խոսելով հասկացնել էր տվել, որ նրանք ևս հավաքականի «երեսը չեն տեսնի»:
2018 թվականի աշխարհի առաջնության ընտրական փուլի ավարտից հետո ըստ էության ոչինչ չի փոխվել: Չնայած «փառահեղ» պարտություններին, քննադատություններին, պահանջներին՝ ֆուտբոլի ֆեդերացիան շարունակում է կործանարար աշխատանքը: Բնական է, Եդիգարյանի կամ Դաշյանի վերաբերյալ Պետրոսյանին հարց ուղղելու դեպքում նա կպատասխանի, որ տակտիկական նկատառումներով ինքը չի հրավիրել նրանց: Կհնչի նաև այն պատասխանը, որ այս խաղացողները ցանկացած պահի կարող են հրավիրվել հավաքական, և նրանց առաջ ազգային թիմի դուռը փակ չէ: Բայց դե բոլորի համար է պարզ, որ դա այդպես չէ:
Իրավիճակն այնպիսին է, որ թե առաջիկա ընկերական հանդիպումներում, թե 2020 թվականի Եվրոպայի առաջնության ընտրական փուլում և թե Ազգերի լիգայի խաղարկությունում Հայաստանի ազգային հավաքականում որևէ դրական տեղաշարժ ակնկալել պետք չէ: Պետրոսյանը դեռ շատ է փնտրելու դոնորների ազգային հավաքականին թարմ արյուն հաղորդելու համար: Ակնհայտ է, սակայն, որ մինչև հայկական ֆուտբոլի «կույրաղիքը չհեռացվի»՝ թարմ արյունը թարմություն չի հաղորդի թունավորված օրգանիզմին:
