«Ադրբեջանին վաճառվող զենքի ծավալների մասով ինչ որ հնչել է ռուս փորձագետների կողմից, դա իրենց կարծիքն է։ Իրենք պատգամավոր են և լիազորություն ունեն նման հայտարարություններ անելու։ Այստեղ կա խնդիր, որը լուծում է Ռուսաստանը»,- «Առաջին լրատվական»-ի հետ զրույցում ասաց ՀՀ պաշտպանության նախկին նախարար Վաղարշակ Հարությունյանը՝ անդրադառնալով ռուս պաշտոնյաներ Կոնստանտին Զատուլինի և Կոնստանտին Կոսաչովի՝ Հայաստան կատարած այցի ժամանակ արված հայտարարություններին, թե Ռուսաստանը ապրիլյան պատերազմից հետո հետևություններ է արել և այլևս նույն ծավալի զենք չի վաճառում Ադրբեջանին։
«Ռուսաստանը այդ զենքի վաճառքով լուծում է խնդիր, որպեսզի ունենա ավելի մեծ ազդեցութուն Ադրբեջանի վրա։ Թե ինչ ծավալով կվաճառի, ինչ զենքեր կվաճառի՝ որոշում է Ռուսաստանը, մենք այստեղ անելիք չունենք։ Մեզ պետք է հետաքրքրի միայն բալանսի պահպանումը։ Մինչ օրս էլ այդ բալանսը պահպանվում է»,- ասաց պաշտպանության նախկին նախարարը։
Վաղարշակ Հարությունյանը նշեց, որ ինքը ճանաչում է Զատուլինին, հետևաբար հավատում և վստահում է նրա խոսքին։
Անդրադառնալով Պուտինի այցին Թուրքիա և ռուս-թուրքական հարաբերությունների մերձեցմանը՝ Հարությունյանը նկատեց, որ Ռուսաստանը իր քաղաքականությունն է իրականացնում, իր շահն է առաջ տանում։
«Ռուսաստանը, գիտակցելով, որ Թուրքիան ունի լրջագույն խնդիր Ամերիկայի, Եվրամիության հետ, բնական է, որ պետք է ամեն ինչ անի, որպեսզի այդ կապը թուլանա։ ՆԱՏՕ-ի անդամ պետությունը, որը ունի երկրորդ բանակը ՆԱՏՕ-ում, հիմա գնում է հարաբերությունների, որպեսզի լուծի իր խնդիրները։ Այստեղ բարդ է գուշակել, թե ինչ կլինի։ Բայց ես ներկա պահին մեզ համար վտանգ չեմ տեսնում։ Ներկա պահին Թուրքիան չի հրահրի Ադրբեջանին ռազմական գործողութունների, մինչև ինքը չլուծի իր խնդիրները։ Պատերազմը հիմա ձեռնտու չէ նաև Ռուսաստանին։ Նա մտել է Եվրոպայի հետ հակամարտության մեջ, կա Ուկրաինայի խնդիրը, ու եթե դրան զուգահեռ այս ճակատում էլ պատերազմ սկսվի, շատ բարդ կլինի, դա լրացուցիչ ռեսուրսներ կպահանջի։ Ռուսաստանը դա թույլ չի տա»,- ասաց Հարությունյանը։
Առավել մանրամասն՝ տեսանյութում: