Հայաստանի պաշտպանության նախարարությունը հայտարարություն է տարածել, որում զգուշացնում է Ադրբեջանին, որ սադրանքի գնալու դեպքում լինելու է կոշտ պատասխան, որի հետևանքի ամբողջ պատասխանատվությունը մնալու է Ադրբեջանի վրա: Այս հայտարարությամբ Հայաստանն արձագանքում է փաստորեն Բաքվի ՊՆ և ԱԳՆ հայտարարությանը, որտեղ նրանք համատեղ հայտարարել են, թե հայկական կողմը սահմանի ամբողջ երկայնքով խախտում է հրադադարն ու թիրախավորում անգամ խաղաղ բնակավայրերը: Ադրբեջանի այս տարօրինակ հայտարարությունն այլ բան, քան հնարավոր սադրանքի նախապատրաստություն որակելը դժվար է:
Մյուս կողմից, դա ուշագրավ է դառնում այն ֆոնին, որ Բաքուն նման քայլի է գնում Պուտին -Ալիև հանդիպումից հետո: Ինչ է դա նշանակում, Ալիևը ստացել է սադրանքի ազդակ կամ ուղղակի թույլտվություն, ցուցում, թե չի ստացել իր ուզածն ու գնում է նման շանտաժի : Եթե բանը թույլտվությունն է, ապա այստեղ, իհարկե, խոսքերն ավելորդ են, և Հայաստանի դաշնակիցը հերթական անգամ խփում է և արդեն նույնիսկ ոչ թիկունքից: Եթե բանը շանտաժն է, ապա այստեղ արդեն ստացվում է, որ Բաքուն շանտաժի է ենթարկում Ռուսաստանին, ինչը նշանակում է, որ` կամ Ռուսաստանը պետք է համարժեք քայլով սանձի Ալիևին, կամ Մոսկվան բացարձակապես ի վիճակի չէ ազդել Բաքվի վրա, և հետևաբար դատարկաբանություն են խոսակցությունները, թե Ռուսաստանը զինելով Բաքվին, պահում է նրան վերահսկողության տակ:
Բոլոր դեպքերում, Բաքվի որևէ սադրանք նշանակելու է Ռուսաստանի անկենսունակություն անվտանգության և կայունության հարցում, ինչն ուղղակի պատասխանն է լինելու հարցի, թե կա՞ արդյոք Հայաստանի համար ռուսական աշխարհաքաղաքական շոգեքարշում լինելու հիմնավորում, երբ այնտեղ բացի իր հաշվին ռուսական կայսերական շահը քարշ տալուց, Հայաստանը չունի անելու այլ բան :
