Քաղտեխնոլոգ Կարեն Քոչարյանը կարծում է, որ հնարավոր նախագահի, վարչապետի հարցը մանր խնդիր է, սրանց հետևից ընկնելով՝ մենք բաց ենք թողնում շատ կարևորները:
«Այնպես չէ, որ նրանք օդից են ընկնելու: ՀՀԿ-ն ապրիլի 2-ին հաղթել է խորհրդարանական ընտրություններում և ինքն է որոշելու ամեն ինչ: Ասենք Գալուստ Գրիգորիչն է լինելու, դրանից ի՞նչ է փոխվելու»,-լրագրողների հետ հանդիպման ժամանակ ասաց նա:
Նրա հետ կարծես լուռ համաձայնեց ԱԺ նախկին պատգամավոր Ռուբեն Հակոբյանը, ով միանգամից անդրադարձավ այլ հարցի, որն է վաղը՝ հունվարի 19-ին «Ելք» դաշինքի «Ո՛չ թանկացումներին և հարկային բեռի ավելացմանը» կարգախոսի ներքո անցկացվող երթին:
«Չեմ հավատում «Ելք»-ի նախատեսած երթի անկեղծությանը: Եթե իրոք ժողովրդին օգնելու խնդիր է դրված, կարծում եմ, որ նախաձեռնող քաղաքական ուժը պետք է կարողանա համախմբել ամբողջ քաղաքական դաշտին: Նախօրոք պետք է հանդիպեին նրանց ու հասարակական կազմակերպությունների հետ: Ի դեպ, սա ավելի շուտ պետք է որևէ հասարակական կազմակերպություն կազմակերպեր, քանի որ քաղաքական հարց չէ»,-նշեց Ռուբեն Հակոբյանը:
Այստեղ նրա հետ չհամաձայնեց Կարեն Քոչարյանը:
«Այստեղ օրենսդրական հարց են ուզում լուծել, քանի որ թանկացումները հենց այնպես չեն եղել: Ցանկանում են օրենքը հետողորմյա անել»,-ընդգծեց քաղտեխոնոլոգը՝ շեշտելով.
«Շատ քաղաքական շարժումներ սկսվել են սոցիալական հարցեր բարձրացնելուց: Մինչև ժողովուրդը չհասկանա, որ իրենից շատ բան է կախված, ոչինչ չի փոխվելու: Քանի դեռ ասում են՝ ինչ ուզում է անեն, ես 5000 կամ 10.000 դրամն եմ վերցնելու, այո՛, ապրելու են այնպես, ինչպես ապրում են, այո՛, գնալով ավելի վատ են ապրելու»:
«Որևէ քաղաքական ուժ չհայտարարեց, որ միանում է «Ելք»-ին, քանի որ միասնական ուժերով պայքարելու խնդիր չի դրված: Այս նարցիսիզմը թույլ չի տալիս համախմբվել: Պետք է վերացնել ասել՝ ես ամենակարողն եմ, չվաճառվածն ու այլընտրանքայինն եմ»,-հակադարձեց Ռուբեն Հակոբյանը:
Շարունակելով նրա միտքը՝ կապված ինքնասիրահարվածության հետ, Կարեն Քոչարյանն ասաց.
«1991 թվականից է սկսվել այս ինքնասիրահարվածությունն ու դրա հիմնադիրը Պարույր Հայրիկյանն է: Նրան հաջորդել են Վազգեն Մանուկյանը, Լևոն Տեր-Պետրոսյանը, Արթուր Բաղդասարյանը: 1998թ., երբ իշխանության թեկնածուն Ռ.Քոչարյանն էր, Վազգեն Մանուկյանն ասում էր՝ ես հաղթել եմ 1.5 տարի առաջ, ես եմ ընդդիմության դեմքը»:
Անի Կարապետյան