«Առաջին լրատվական»-ի զրուցակիցն է Արցախի խորհրդարանի իշխող «Ազատ հայրենիք» կուսակցության պատգամավոր Ռուդիկ Հյուսնունցը։
– Պարոն Հյուսնունց, Հայաստանում տեղի ունեցող նախընտրական քարոզարշավից անմասն չմնաց նաև Արցախը, Արցախյան հարցը։ Դուք գիտեք, որ վարչապետ Փաշինյանը բավականին սուր ուղերձ հղեց Բակո Սահակյանին։ Առհասարակ այս մթնոլորտը վտանգավոր չե՞ք գնահատում։
– Վտանգավոր դառնալու միտումներ կան, բայց հարցը կարծես թե մենք ուռճացնում ենք՝ թե՛քաղաքական գործիչները, թե՛ պատգամավորները, թե՛ դաշտում գտնվող բոլոր այն գործիչները, որոնք ասելիք ունեն։ Մենք որևէ լարվածություն չունենք, եթե որոշ մարդիկ իրենց լիազորությունները չարաշահել են, համենայնդեպս՝ ես կարծում եմ, որ բանավոր կամ գրավոր նկատողություն կստանան և պատասխանատվության կենթարկվեն։ Ես հաստատ համոզված եմ, որ հետևանքներ լինելու են, մարդիկ իրենց լիազորությունները չարաշահում են ու փաստորեն պարզաբանումներ են պահանջում երկրի գերագույն գլխավոր հրամանատարից։ Սա անընդունելի է, անընդունելի է նաև, երբ արցախցի մեր գործընկերները, չարաշահելով իրենց լիազորությունները, միջամտում են Հայաստանի խորհրդարանական ընտրությունների քարոզարշավին, ներքաղաքական կյանքին։
Հաջորդը պետք է մեջբերեմ մեր կուսակցության նախագահ Արայիկ Հարությունյանի հայտարարությունը։ «Ազատ հայրենիք» կուսակցությունը՝ մեր կուսակցության ղեկավարի գլխավորությամբ, անվերապահորեն աջակցում ենք Նիկոլ Փաշինյանի որդեգրած քաղաքական կուրսին։
– Այդուհանդերձ, ինչի՞ հետ է կապված Արցախի որոշ չինովնիկների այդօրինակ վերաբերմունքը։ Տպավորություն է, թե նրանք չեն ընկալում Հայաստանում տեղի ունեցածը և շարունակում են նախկին համակարգի կանոններով աշխատել։
– Այն, ինչ Նիկոլ Փաշինյանն արեց Հայաստանում, մենք 30 տարուց ավելի սպասել ենք։ Մենք ցանկացել ենք, որ սոցիալական արդարություն լինի, հավասարությունն իշխի, հովանավորյալներ չլինեն։ Մենք այսօր ուրախ ենք, որ այդ ամենը Հայաստանում կա։ Եթե կան անհատներ, որոնց համար այս ամենը դիսկոմֆորտ է, իրենց խնդիրն է։ Հայաստանի և Արցախի իշխանություններն իրար ուս ուսի տված պետք է դիմակայեն մարտահրավերներին, ամեն պարագայում պետք է խնդրի լուծումը միասին գտնենք։
– Արցախյան հարցի հաջորդ շահարկումը Դավիթ Շահնազարյանի կողմից էր՝ առ այն, թե իբր նոր իշխանությունները եկել են Արցախը հանձնելու, և ավելի վտանգավոր են, քան Ադրբեջանի իշխանությունները։ Որքան էլ այս հայտարարությունը նախընտրական պայքարի ժամանակ է արվում, արդյոք վտանգավոր չե՞ք համարում։
– Անկեղծ ասած՝ Դավիթ Շահնազարյանի այդ հայտարարությունը ներքաղաքական տիրույթում է, իմ կարծիքով՝ դա իրականության հետ որևէ աղերս չունի։ Նիկոլ Փաշինյանը Արցախյան հարցի հետ կապված իր պատկերացումները հստակ ու պարզ ձևակերպել է։
– Հասկանալի է, որ ներքին լսարանի համար է, իսկ արտաքին առումով վտանգներ չկա՞ն։
– Ես վտանգներ չեմ տեսնում, պարզապես ընտրապայքար է։ Ես, իհարկե, ավելի սուր ներքին հարցադրումներ էի սպասում, բայց սա էլ նորմալ է, էլեկտորատ հավաքելու հարց կա։ Ամեն մի քաղաքական ուժ իր ռազմավարությունն ու տակտիկան ունի։ Սա էլ այդ շարքից է, ու ես որևէ լուրջ վտանգ չեմ տեսնում։