Վերջին 2-3 օրերի ընթացքում ակնհայտ դարձավ, որ ռուսական «Աէրոֆլոտ» ավիաընկերությունը Երևանից թռիչքների համար առաջարկում է գիշատիչ՝ բարձր գներ:
Մոսկվայից Հայաստան վերադառնալ ցանկացող քաղաքացիներից մեկը, ով այս օրերին տոմս ձեռք բերելու նպատակով հետևում է ավիաընկերության կողմից կատարվող գնային քաղաքականությանը, «Առաջին լրատվական»-ին տրամադրեց լուսանկարներ՝ արված տարբեր օրերին, որտեղ երևում է, թե ինչպես է ամեն օր Մոսկվա-Երևան չվերթի տոմսերի արժեքը բարձրանում։
Ըստ այդմ՝ հոկտեմբերի 3-ի համար «Աէրոֆլոտ»-ի բիզնես կարգի տոմսերը կազմում են 61 հազար ռուբլի, որը մոտավոր կազմում է 430 հազար դրամ։ Կոմֆորտ և էկոնոմ կարգի տոմսերը համապատասխան՝ 26 հազար 623 և 11 հազար 853 ռուբլի։ Դրամի վերածած՝ 186 և 82 հազար դրամ։
Վարչապետի նախկին խորհրդական Հակոբ Ճաղարյանի կարծիքով՝ ռուսական ավիաընկերության այս գործելաոճը ՀՀ ավիացիոն իշխանությունների բացարձակ անգործության հետևանքն է։ «Միջազգային կարգավորումները նախատեսում են այսպիսի իրավիճակ՝ մեծ ընկերությունների կողմից ամբողջ շուկան կամ նրա մի սեգմենտը մոնոպոլիզացնելուն ուղղված քայլերի դեպքում: Եվ առաջարկում են համապատասխան գործառույթներ` երկրի տնտեսական շահը և ուղևորների ազատ տեղաշարժի իրավունքը պահպանելու: Այսպիսի դեպքերում ՀՀ ավիացիոն իշխանությունները (եթե նրանք գոյություն ունեն) իրավասու են դուրս վռնդել գիշատչին և արգելել այդ ընկերության մուտքն ինքնիշխան պետության տարածք: Ինչպես դա արեց հարևան Վրաստանը: Իրենց անելիքն ունեն նաև ՏՄՊՊՀ և Հանրային ծառայությունները կարգավորող հանձնաժողովը»,- կարծիք է հայտնել Հակոբ Ճաղարյանը։
«Առաջին լրատվական»-ի հետ զրույցում ավիացիոն փորձագետ Նավիկ Խաչատրյանը նշեց այն երկու պատճառները, որոնք հանգեցրել են այս իրավիճակին։ Առաջինը՝ ռեալ մրցակցության բացակայությունը, երկրորդը՝ ավիացիոն իշխանությունները չեն պաշտպանում երկրի օդային տարածքը, լինելով անկախ երկիր։
«Այս ամենը հետևանքն է նրան, որ քաղավիացիայի կոմիտեն ու 2013 թվականի վարչապետը բաց երկնքի քաղաքականություն հայտարարեցին, որ ով ուզի, երբ ուզի, կարող է թռնել Հայաստան։ Եթե նայեք վիճակագրությունը՝ հոկտեմբերի 23-ին ընդունեցին օրենքը, հոկտեմբերի 24-ին ռուսական 8 ընկերություն ցանկություն հայտնեց Մոսկվայից Երևան թռնել։ Դուք երկու կարևոր հարց եք բարձրաձայնում՝ գնային քաղաքականությունը և քաղավիացիայի անգործությունը։ Ինչ արեցին այն ժամանակ ռուսները։ Այն ժամանակ ՀՀ-ում կար մեկ ավիափոխադրող՝ «Էյր Արմենիա»-ն, որը դեպի ՌԴ մի քանի ուղղություններով չվերթներ էր իրականացնում։ Ռուսները սահմանեցին ցածր գներ, «Էյր Արմենիա»-ն, չդիմանալով մրցակցությանը, սնանկացավ։ 8 ամսվա մեջ «Էյր Արմենիա»-ին դուրս հանեցին շուկայից։ Տեղում ռեալ մրցակից չեղավ, որից հետո շեշտակիորեն բարձրացրին գները։ Ահա ողջ պատմությունը։ Խնդիրն այն է, որ ռեալ մրցակից չկա։ Մրցակիցները բոլորն էլ ռուսական ընկերություններ են, որոնց համար իրար մեջ պայմանավորվելը հեշտ է։ Կարող են հանդիպել ու որոշել գին սահմանել դեպի Երևան։ ՀՀ ավիատոմսերի շուկայի 70 տոկոսը ռուսներինն է։
Երկու տարի է կոկորդներս ճղում ենք, որ Հայաստանում պետք է ընկերություն ստեղծել»,- ասաց ոլորտի մասնագետը։
Խաչատրյանը չի զարմանում, որ Մոսկվա-Երևան տոմսի արժեքը 700 դոլար է, քանի որ ռեալ մրցակցի բացակայությունը հանգեցնում է նման իրավիճակի։
«Պետք չէ զարմանալ, որ այդ գներով տոմս են վաճառում։ Երբ «Արմավիա»-ն կար, 2008-ի օգոստոսին Երևան-Մոսկվա տոմսի արժեքը 43 հազար դրամ, մոտ 100 դոլար էր, իսկ հիմա անհամեմատ բարձր է։ Աշխարհում չկա նման բան՝ երկուսուկես ժամ թռիչքի համար գանձել 700 դոլար։ Նման գին չկա։ Այն բարդակը, որ տիրում է ավիացիայում, հանգեցրել է այս վիճակին, որի մասին իշխանություններից ոչ ոք չի էլ ցանկանում խոսել։ Սա կարող է այնքան տևել, մինչև մեր իշխանությունը չորոշի ուշադրություն դարձնել այս խնդիրներին, կանչել մասնագետների, քննարկել։ Մենք տեղներս նստած չենք, մենք բարձրացնում ենք այս խնդիրները, մեզ լսող չկա»,- տեսակետ հայտնեց Նավիկ Խաչատրյանը։
