«Երիտասարդ տարիքում պաշտոններ եմ զբաղեցրել և կարծում եմ՝ երիտասարդ լինելն առավելություն է։ Իսկ երիտասարդության և փորձի համադրումը, դա իդեալական տարբերակ է»,-լրագրողների հետ զրույցում, պատասխանելով այն հարցին, թե որքանով է ճիշտ ու նպատակահարմար 25 տարեկանին ոստիկանապետ կամ ԱԱԾ տնօրեն նշանակելը, ասաց նախկին փոխոստիկանապետ, Սյունիքի մարզպետ Հունան Պողոսյանը։
Հարցին, թե արդյոք կհանդուրժի, որ իրեն 25 տարեկանը ղեկավարի, Պողոսյանը նշեց. «25 չէ, բայց 29 տարեկանում ղեկավարել եմ և կարծում եմ, որ շատ նորմալ է, եթե ղեկավարը նորմալ է, պատրաստված, պատասխանատվության մեծ զգացումով և պետականություն կա մեջը»։
Անդրադառնալով փոխոստիկանապետ Հովհաննես Քոչարյանի ազատմանը, Պողոսյանը շեշտեց, որ միայն վերջինս գիտի, թե ինչի համար է ազատվել։
Լրագրողը հետաքրքրվեց, թե հիշում է, որ թավշյա հեղափոխության ժամանակ բիրտ ուժ կիրառելու հարամաններ էր տալիս, մարզպետը նշեց. «Չէ, չեմ հիշում։ Պարզապես հիշեցի, որ ձեզ հորդորել եմ հատուկ տեխնիկան չնկարել։ Եթե դուք դա բիրտ ուժ կիրառել եք համարում, չարաչար սխալվում եք»։