Նորք-Մարաշի զինված խմբի գործով այսօրվա դատական նիստը հետաձգվեց հետևյալ պատճառով՝ Դատապարտյալների հիվանդանոցից դատարան չէր ներկայացել ամբաստանյալ Վահան Շիրխանյանը: Հիվանդանոցների պատասխանատուների ստորագրությամբ արձանագրություն էր կազմվել, որ ամբաստանյալ Վահան Շիրխանյանը այսօր «կտրականապես հրաժարվել է դատական նիստին ներկայանալ»:
Վահան Շիրխանյանը բողոքել է միջգոտկային ցավերից: Ըստ բժիշկների կազմած արձանագրության՝ ներկայումս Վահան Շիրխանյանի ընդհանուր վիճակը գնահատվել է բավարար, նա կարող է մասնակցել դատական նիստին, բայց չի ցանկացել:
Նախագահող Արմեն Բեկթաշյանը հրապարակեց նաև փաստաբան Սիրուշ Աղվանյանի դիմումը՝ այսօրվա նիստը մինչև 13.00-ը հրապարակելու վերաբերյալ, քանի որ ինքը զբաղված է ներկայիս քաղաքացիական գործով: Դատարանը փաստաբաններ Աղվանյանի և Բաղդասարյանի բացակայությունը համարեց անհարգելի:
Վահան Շիրխանյանի շահերի պաշտպան, փաստաբան Հայկ Ալումյանը հայտարարեց. «Տեղեկություններ դեռ չունեմ, թե այսօր ինչի ա շուտ ներկայացել իմ պաշտպանյալը, այն, որ նա կարող է մասնակցել դատական նիստերին, չի նշանակում, որ այսօր ի վիճակի է եղել ներկայանալու, ճանապարհն էլ նրան ֆիզիկական տառապանքներ է պատճառում: Եթե հնարավորություն ունենար, անպայման կներկայանար»:
Պաշտպան Ալումյանը նաև հայտարարեց, որ զինված խմբի ղեկավար Արթուր Վարդանյանի և ամբաստանյալ Հայր Անտոնի միջև նրանց պաշտպանների բացակայության պայմաններում ներկայումս նստած է ոստիկան, որ այս երկու ամբաստանյալները չշփվեն: Այս երկու ամբաստանյալների շահերի միջև էական հակասություններ կան, բայց նրանց պաշտպանում են նույն փաստաբանները, ինչը փաստաբանության մասին օրենքի կոպիտ խախտում է:
Հայտարարությամբ հանդես եկավ նաև ամբաստանյալ Հարություն Սարիբեկյանը. «Ես երեկվանից հացադուլ եմ հայտարարել՝ պահանջելով փոխել իմ խափանման միջոց կալանավորումը՝ առողջական խնդիրների պատճառով, համաձայն չեմ ինձ առաջադրված մեղադրանքին»:
Դատարանը Հարություն Սարիբեկյանի խնդրին կանդրադառնա հաջորդ դատական նիստին, որը տեղի կունենա հոկտեմբերի 13-ին:
