Պատմության հետագծով
ԵՐԵՎԱՆ, 1 ՕԳՈՍՏՈՍԻ, ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ/ ԱՐՄԵՆՊՐԵՍ: 1921 թ. օգոստոսի 1-ին ծնվել է Լիլի Չուգասզյանը՝ ծագումով հայ ամերիկացի հայտնի օպերային երգչուհի (կոնտրալտո), 1960-80-ական թթ. երգել է «Մետրոպոլիտեն» օպերայում եւ Նյու Յորքի օպերային թատրոններում (մահ.՝ 2012 թ.):
* 1933 թ. օգոստոսի 1-ին ծնվել է Զորայր Խալափյանը՝ հայ գրող, արձակագիր եւ դրամատուրգ (մահ.՝ 2008 թ.):
* 1934 թ. օգոստոսի 1-ին Երեւանում սկսվեց Հայաստանի գրողների միության առաջին համագումարը։
* 1903 թ. օգոստոսի 1-ին ծնվել է Գուրգեն Մահարին (Գուրգեն Գրիգորի Աճեմյան)՝ հայ բանաստեղծ, արձակագիր, գրականագետ, ՀԽՍՀ մշակույթի վաստակավոր գործիչ (1965 թ.)։
* 1917 թ. օգոստոսի 1-ին ծնվել է Ժակ Հակոբյանը՝ բանաստեղծ: Նրա ստեղծագործության հիմնական թեման հայրենաբաղձությունն է, կարոտի, «նահանջի» մոտիվները։
* 1917 թ. օգոստոսի 1-ին ծնվել է Լեւոն Բաբայանը՝ հայ պատմաբան:
* 1946 թ. օգոստոսի 1-ին ծնվել է Արաքս Մանսուրյանը՝ հայ օպերային երգչուհի, սոպրանո։ Կոմպոզիտոր, ՀԽՍՀ արվեստի վաստակավոր գործիչ Տիգրան Մանսուրյանի եւ նկարիչ Մհեր Մանսուրյանի քույրն է, ՀՀ վաստակավոր արտիստ Շուշան Պետրոսյանի մայրը։
* 1956 թ. օգոստոսի 1-ին ծնվել է Անուշավան Դանիելյանը՝ հայ քաղաքական գործիչ ,1994 թ. նշանակվել է Լեռնային Ղարաբաղի Հանրապետության վարչապետ:
* 1936 թ. օգոստոսի 1-ին մահացել է դերասան Հովհաննես Աբելյանը՝ հայ դերասան, ՀԽՍՀ ժողովրդական արտիստ։
* 1938 թ. օգոստոսի 1-ին մահացել է սովետական դիվանագետ Ալեքսանդր Բեկզադյանը՝ հեղափոխական գործիչ, իրավաբանական գիտությունների դոկտոր (1913)։ 1920 թ. նոյեմբերին նշանակվել է ՀԽՍՀ արտաքին գործերի ժողկոմ, 1926-1930 թթ. եղել է Անդրֆեդերացիայի Ժողկոմխորհի նախագահի տեղակալ եւ առեւտրի ժողկոմ։ 1930-1934 թթ. ԽՍՀՄ դեսպանն էր Նորվեգիայում, իսկ 1934-1937-ին՝ Հունգարիայում։
* 1953 թ. օգոստոսի 1-ին մահացել է Գաբրիել Հարությունյանը՝ հայ խորհրդային բժշկապատմաբան, մանկաբարձ-գինեկոլոգ։ Բժշկական գիտությունների դոկտոր (1953), ՀԽՍՀ վաստակավոր բժիշկ (1944)։
* 1959 թ. օգոստոսի 1-ին մահացել է Արտաշես Բաբալյանը՝ հայ բժիշկ, հասարակական-քաղաքական գործիչ, հրատարակիչ, դաշնակցական կուսակցության անդամ։ Հայաստանի Դեմոկրատական Հանրապետության կառավարության անդամներից մեկը, Հայաստանի առաջին եւ երկրորդ խորհրդարանների անդամ։ 1919 թ. հոկտեմբերի 31-ից 1920 թ. մայիսի 5-ը եղել է սոցիալական ապահովության նախարար։
* 1964 թ. օգոստոսի 1-ին մահացել է Գրիգոր Ամիրյանը՝ հայ հեղափոխական գործիչ, մասնակցել է Հայաստանի Դեմոկրատական Հանրապետության ստեղծմանը։
Մ. Ա.
Բաժանորդագրվեք մեր ալիքին Telegram-ում