Ռոման Բերեզովսկու անվան ֆուտբոլային մրցաշարում հաղթող ճանաչվեց Վանաձորի թիվ 1 դպրոցի թիմը
ԳՅՈՒՄՐԻ, 10 ՄԱՅԻՍԻ, ԱՐՄԵՆՊՐԵՍ: Գյումրու Արամ Սարգսյանի անվան խաղերի մանկապատանեկան մարզադպրոցում մայիսի 10-ին կայացավ դպրոցականների ֆուտբոլային մրցաշար, որին մասնակցում էին ԿԳՄՍ նախարարության Վանաձորի թիվ 1, Գյումրու թիվ 6 և 23, ինչպես նաև ՌԴ կրթության նախարարության ենթակայության Գյումրու թիվ 19 դպրոցի աշակերտները:
Ինչպես տեղեկացնում է «Արմենպրես»-ը՝ մրցաշարն այս տարի պիլոտային է և անցկացվում է Ռոման Բերեզովսկու մրցանակի համար՝ հաջորդ տարի նախատեսված ֆուտբոլային մեծ մրցաշարի նախապատրաստման շրջանակում: Այն նպատակ ունի մասսայականացնել բակային ֆուտբոլը:
Հայաստանի ազգային հավաքականի դարպասը 20 տարի պաշտպանած հայտնի դարպասապահ Ռոման Բերեզովսկուն մրցումներին տեսնելը շատ երեխաների համար անսպասելի էր ու լավագույն նվերը: Այն փաստը, որ հայտնի դարպասապահն իրենց հետևում է հանդիսականների աթոռին նստած, ոգևորում էր: «Արդեն իսկ լավ երեխաների եմ տեսնում, հենց այսպես պետք է լավ ֆուտբոլիստներ ծնվեն: Հույս ունեմ, որ երեխաները կկարողանան մրցելուց բացի նաև լավ ընկերներ դառնալ, քանի որ ֆուտբոլում հաղթում են ընկերական լավ խաղի շնորհիվ»,- «Արմենպրես»-ի հետ ունեցած զրույցի ժամանակ ասաց Ռոման Բերեզովսկին՝ խորհուրդ տալով երեխաներին շատ աշխատել:
Մրցաշարն անցավ համառ պայքարում: Արդյունքում երրորդ հորիզոնականում հայտնվեց Գյումրու թիվ 6 դպրոցի թիմը, երկրորդում՝ թիվ 23 դպրոցի թիմը, իսկ լավագույն թիմը Վանաձորի թիվ 1 դպրոցինն էր: Լավագույն եռյակի համար նախատեսված էին գավաթներ ու մեդալներ: Խրախուսական մրցանակի արժանացավ թիվ 19 դպրոցը: Հայաստանի Ֆուտբոլի ֆեդերացիան բոլոր թիմերին գնդակներ նվիրեց:
«Տպավորությունս շատ մեծ է: Հատկապես վերջին խաղը համառ պայքարում էր ընթանում, շատ հետաքրքիր գոլային պահերի ականատեսն եղա: Շատ լավ էր ամեն ինչ կազմակերպված»,-վերջում իր տպավորությունները կիսելով՝ նշեց հայտնի դարպասապահը՝ անկեղծանալով, թե նույնիսկ եղան պահեր, երբ ցանկություն կար երեխաների հետ խաղահրապարակում հայտնվելու:
Մրցաշարն անցկացվեց Ռոսսոտրուդնիչեստվոյի հովանու ներքո՝ Հայաստանի ֆուտբոլի ֆեդերացիայի ու ՀՀ ԿԳՄՍՆ աջակցությամբ: Մրցույթի համակազմակերպիչն էր «Բարության ուղի» հասարակական կազմակերպությունը:
Արմենուհի Մխոյան
Բաժանորդագրվեք մեր ալիքին Telegram-ում