Նախօրեին տեղի է ունեցել Հայաստանի Հանրապետության երկրորդ նախագահ Ռոբերտ Քոչարյանի հանդիպումը տնտեսական վերլուծաբանների և տնտեսական թեմաներ լուսաբանող լրագրողների հետ։ Այս և այլ թեմաների շուրջ «Առաջին լրատվական»-ը զրուցել է «Քաղաքացու որոշում» կուսակցության գործադիր մարմնի անդամ Հայկ Սահակյանի և քաղաքագետ Արմեն Վարդանյանի հետ:
«Իշխանությունն ական է դնում այս երկրի ապագայի և ներդրումային մթնոլորտի վրա»- հայտարարել է Ռ. Քոչարյանը: Նա անդրադարձել է նաև Ամուլսարի թեմային և նշել, որ կատարվող բոլոր գործընթացները պետական կառավարման ձախողման հետևանք են:
Հայկ Սահակյանի դիտարկմամբ՝ Ռոբերտ Քոչարյանը անցած էջ է՝ քաղաքական դիակ. «Նախկինները սկսել են ակտիվանալ և խոսել իրողություններից, որի իրավունք ունեն միայն հետհեղափոխական ուժերը… Ամուլսարի թեման քաղաքացու և պետության քննարման թեմա է… Քաղաքական դիակը, մարդ, որն ազդեցություն չունի քաղաքական գործընթացների վրա, խոսում է հանրային նշանակություն ունեցող խնդիրներից, սա լրջագույն խնդիր է, մենք մտածելու բան ունենք ոչ թե Քոչարյանի ասածների շուրջ, այլ երևույթի մասին: Քոչարյանն ասելիք չունի, նրա պատկերացումները հնացած են և արժեք չունեն»:
Արմեն Վարդանյանի դիտարկմամբ՝ Ռոբերտ Քոչարյանը հեռու գնացող նպատակներ ունի. «Նա ցանկանում է մտնել քաղաքականություն, դրա համար նա հիմք է նախապատրաստում… Իսկ քաղաքական գործընթացներին մասնակցելու համար գործիչները պետք է դիրքորոշում հայտնեն… Քոչարյանն ունի վստահության խնդիր և փորձում է փոխել հասարակության կարծիքն իր նկատմամբ, փոխել իր իմիջը, և դրա համար օգտագործում է իր սեփական ԶԼՄ-ներն ու ֆինանսական միջոցները: Եթե Քոչարյանը մնա ազատության մեջ, կա՛մ կուսակցություն է ստեծելու, կա՛մ որևէ կուսակցության հետ մտնելու է քաղաքականություն: Նրա հետագա գործունեությունը կախված է իշխանություններից, բայց այն, որ Քոչարյանը քաղաքական հայտ է ներկայացնում, դա ակնհայտ է»:
Մանրամասն՝ տեսանյութում:
