Թուրքիայի կողմից Սիրիայի Աֆրին ներխուժման գործողության մասնակից զինյալ խմբավորումների եւ թուրքական բանակի հրամանատարների միջեւ 2 լուրջ միջադեպ է գրանցվել։
Ինչպես տեղեկացնում է քրդական ANF–ը, Սիրիայի Ազեզում Աֆրինի գործողության ժամանակ մեծ թվով կորուստներ տված եւ Թուրքիայի հովանավորությամբ ստեղծված «Սիրիայի ազգային բանակ» անունով զինված խմբավորման անդամների եւ թուրքական զորքի հրամանատարի միջեւ վիճաբանության ժամանակ զինյալները պահանջել են իրենց տված զոհերի մասին էլ հայտնել մամուլին։ «Մենք արդեն 490 զոհ ու վիրավոր ունենք։ Ինչու այդ մասին չեք հայտնում մամուլին»,–ասել են զինյալները, ինչին ի պատասխան, թուրք հրամանատարը պատասխանել է. «Ձեր վրա արդեն 6 մլն դոլար ենք ծախսել, ինչո՞ւ լավ չեք կռվում»։
Մյուս միջադեպը գրանցվել է Թուրքիայի Հաթայ նահանգի Քըրըքհան շրջանում Թուրքիա–Սիրիա սահմանային բետոնե բլոկերով շարված պատի մոտ։ Հատուկ միջոցներով երկու բլոկ հանվել է պատից, որից հետո զինված խմբավորումները եւ թուրքական զորքերի մի մասը մտել է Աֆրինի Չեքելա գյուղի տարածք։ Սակայն թուրքական զորքը շատ արագ հետ է քաշվել Թուրքիայի տարածք եւ հետեւից բետոնե բլոկներով փակել պատը՝ զինյալներին թողնելով Աֆրինի տարածքում քրդական ուժերի դեմ միայնակ կռվելու։
Նշենք, որ Թուրքիան հունվարի 20–ին նախաձեռնել է Աֆրին ներխուժման գործողությունը, որին առաջնագծում մասնակցում են թուրքական հովանավորութմաբ ստեղծված տարբեր զինված խմբավորումները։ Թուրքական կանոնավոր բանակի ուժերը 2–րդ գիծ են առաջ շարժվում։
Նշենք, որ թուրքական պաշտոնական տեղեկությունների համաձայն թուրքական կանոնավոր բանակը տվել է 3 սպանված։