ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ ղարաբաղյան կարգավորման ձևաչափի փոփոխություն հնարավոր է միայն կողմերի համաձայնության հիման վրա։ Անդրադառնալով Արցախի՝ բանակցային սեղանի շուրջ վերադառնալու Հայաստանի առաջարկին, նա նշել է․»Եթե ինչ-որ փուլում կողմերը պայմանավորվեն, որ Լեռնային Ղարաբաղը նորից ներկայացվելու է բանակցություններում, ապա դա կլինի հենց կողմերի որոշումը, և մենք այն կհարգենք։ Դա ոչ միայն մեր դիրքորոշումն է, դա նաև եռյակի (ԵԱՀԿ ՄԽ) մյուս երեք անդամների դիրքորոշումն է»։ Քաղաքագետ Արմեն Բաղդասարյանն «Առաջին լրատվական»-ի հետ զրույցում, անդրադառնալով Զախարովայի հայտարարությանը, նշեց, որ Արցախը վաղ թե ուշ վերադառնալու է բանակցային սեղանի շուրջ, դրանում կասկած լինել չի կարող, բայց այս պահին իրատեսական չէ Արցախի վերադարձը բանակցությունների սեղանի շուրջ։ Նրա խոսքով՝ մինչ այդ բազմաթիվ քայլեր կան անելու։
«Համանախագահները, այդ թվում՝ Ռուսաստանը, այդպիսի հայտարարություն անելով, իրենց դիրքորոշումն են ցույց տալիս, և սա կարելի է գնահատել համանախագահների վերջին հայտարարությունից հետո մեղմացում։ Վերջին հայտարարության մեջ նրանք կողմերին կոչ էին անում ձեռնպահ մնալ ձևաչափը փոխելուց, իսկ հիմա ասում են՝ եթե համաձայնեցնեք, խնդիր չէ։ Այսինքն՝ մենք սա կարող ենք գնահատել որպես դիրքորոշման մեղմացում»,-ասաց քաղաքագետը։
Այս մեղմացումը քաղաքագետը պայմանավորում է ԵԱՀԿ Մինսկի խմբի համանախագահների ցանկությամբ, որ բանակցությունները, այնուամենայնիվ, շարունակվեն, որովհետև վերջին հայտարարությունները՝ և՛ Ադրբեջանի կոշտ հայտարարությունները, և՛ Հայաստանի կոշտ դիրքորոշումը այնպիսի մթնոլորտ էին ստեղծում, որ կարող էին անգամ կասկածի տակ դրվել բանակցությունների շարունակությունը և Փաշինյան-Ալիև հանդիպումը։
«Այս կոչով համանախագահները ամեն դեպքում ձգտում են մեռյալ կետից շարժել բանակցային գործընթացը, և այս իմաստով դրական է»,-հավելեց նա։
Երեկ ԱԺ-ում լրագրողների հետ զրույցում ԱԳ նախարար Զոհրաբ Մնացականյանը հայտարարեց, որ նոր մոտեցումներով, նոր տրամադրությամբ փորձում են զարկ տալ բանակցային գործընթացին։ Ըստ քաղաքագետի՝ խոսքը նոր ռազմավարության մասին չէ, և եթե մի կողմ թողնենք բոլոր դիվանագիտական ձևակերպումները, խնդրի էությունը հետևյալն է՝ մենք պետք է սպասենք և տեսնենք՝ ինչ զիջումների է պատրաստ Ադրբեջանը, և քանի դեռ զիջումների պատրաստակամության մասին չի հայտնել, բացարձակապես անիմաստ է քննարկելը, թե մենք ինչ զիջումների ենք պատրաստ, որն է մեր կարմիր գիծը, սա մեր դիրքերը թուլացնում է։
«Մենք պետք է սիմետրիկ քայլերի գնանք, ոչ մի դեպքում առաջ չընկնենք զիջումների հարցում, սպասենք տեսնենք՝ եթե Ադրբեջանն իսկապես պատրաստ է առարկայական զիջումների, նոր դրանից հետո կարելի է քննարկել, թե մենք ինչ քայլեր ենք անելու»,-ասաց քաղաքագետը՝ հավելելով, որ ցանկացած բանակցություն դրական է, պարզապես պետք է հստակեցումներ լինեն՝ ինչի շուրջ ենք բանակցում, ով բանակցելու իրավունք ունի և ով ինչ է պատրաստ զիջել։
«Ցավոք սրտի, Արդբեջանի կողմից մենք նման պատրաստակամություն չենք տեսնում, բայց բանակցությունների իմաստն է հենց այն է, որ ձգտենք հասնել նրան, որ իրենք հայտնեն իրենց զիջումների մասին>,-ասաց Բաղդասարյանը։
