Ձեր վստահելի աղբյուրը

ԱՄՆ պետքարտուղար Մայքլ Պոմպեոն հայտարարել է, որ ԱՄՆ-ի կողմից Իրանի դեմ պատժամիջոցները կանդրադառնան նրա հետ առևտրային հարաբերություններ ունեցող բոլոր երկրների վրա:

Նա նշել է, որ «մի շարք որոշումներ դեռևս մշակվում են մինչև վերջնաժամկետը՝ նոյեմբերի 1-ը։ Նոյեմբերի 4-ից կլինեն սկզբունքորեն տարբեր կանոններ, որոնք կանդրադառնան բոլոր նրանց, ովքեր անհրաժեշտ կհամարեն Իրանի հետ տնտեսական գործունեությամբ զբաղվելը: Դա կլինի լուրջ, կարևոր օր», - ասել է Պոմպեոն:

Թե որքան լուրջ հետևանքներ կարող են Իրանի դեմ ամերիկյան պատժամիջոցները նոյեմբերից ունենալ նաև Հայաստանի վրա (հաշվի առնելով այն հանգամանքը, որ մի շարք բնագավառներում Հայաստանը սերտորեն համագործակցում է  Իրանի հետ), Panorama.am-ի թղթակիցը զրուցեց իրանագետ Վարդան Ոսկանյանի հետ։

«Նախ, կցանկանայի ասել, որ երևէ երկրի դեմ որևէ պատժամիջոց չի կարող դրական ազդեցություն ունենալ տվյալ երկրի և նրա հետ փոխգործակցող մյուս երկրների վրա՝ ինչպես տնտեսական, այպես էլ քաղաքական առումներով։ Հետևաբար, կարծում եմ, որ ԱՄՆ պետքարտուղարի այս հայտարարությունն ունի բացառապես քարոզչական բնույթ։ Ինչ վերաբերում է նոյեմբերի մատնանշմանը, ապա կարծիք կա, որ այդ ամսից սկսած՝ Միացյալ նահանգները պատժամիջոցային համակարգ սկսելու է կիրառել նաև իրանական նավթի հանդեպ։ Իրանի տնտեսության նավթային եկամուտները առյուծի բաժին են կազմում, հետևաբար այս ոլորտում կիրառված պատժամիջոցները կարող են ամենամեծ ազդեցությունը թողնել Իրանի տնտեսության վրա՝ ստեղծելով լրացուցիչ հսկայական դժվարություններ»,-ասաց մեր զրուցակիցը։

Անդրադառնոլով Իրանի դեմ ամերիկյան պատժամիջոցների՝ մեր երկրի վրա հնարավոր ազդեցությանը, Վարդան Ոսկանյանը նկատեց՝ ակնհայտ է, որ ցանկացած պատժամիջոց երկու երկրների հարաբերություններում ստեղծում է լրացուցիչ ռիսկեր։ Խոսքը վերաբերում է  ինչպես տնտեսական, այնպես էլ քաղաքական հարթություններին։

«Մասնավորապես, շատ դեպքերում տնտեսական հարաբերությունները լրջորեն նպաստում են քաղաքկան հարաբերություններին։ Այս իմաստով, թեև Հայաստանի և Իրանի միջև քաղաքական խնդիրներ չկան, բայց թեկուզ միայն պատժամիջոցների սպառնալիքը կարող է մեր գործարարներին հետ պահել կյանքի կոչելու Իրանի հետ կապված իրենց տնտեսական ծրագրերը։

Մյուս կողմից Իրանում ևս կան  տնտեսական հնարավորություններ, որոնք կարող են օգտագործվել Հայաստանի հետ հարաբերություններում։ Իրան-Հայաստան սահմանին գործում է Մեղրու ազատ տնտեսական գոտին, և մենք ակնկալիքներ ունենք, որ այն պետք է աշխատի իրանական ներդրումների շնորհիվ։ Միաժամանակ, փորձությունները երբեմն դուռ են բացում նոր հնարավորությունների համար, իսկ Իրանի դեմ պատժամիջոցներն, անշուշտ, փորձություն են։ Մենք ունեցել ենք շատ դրական փորձ՝ աշխատելու Իրանի համար պատժամիջոցային խիստ պայմաններում, որոնք կիրառվել են նախկինում։ Հիշենք, օրինակ Իրան-Հայաստան գազամուղի շինարարությունը և գործարկումը»,- ամփոեց իրանագետը։