Թանկից էժանը՝ panorama.am-ֆիննախ
11.01.2018թ-ին ՀՀ ֆինանսների նախարար Վարդան Արամյանը հայտնեց, որ «Պահուստներից կվաճառվեն 4712 հատ արհեստական քար, 1177 գրամ արհեստական քարերից շարաններ, 256,3 կարատ զմրուխտ, 3575,76 կարատ ադամանդ, ընդհանուր առմամբ ավելի քան 100 կիլոգրամ արծաթյա ու ոսկյա իրեր և այլն»:
Վաճառքի մասին իր հայտարարությունը նախարարը հիմնավորել էր որպես՝ «այս ապրանքները պահելը չափազանց թանկ է»:
Panorama.am-ը հարցում էր արել նախարարություն. «Թույլ տվեք իմանալ՝ ինչումն է մետաղը պահելու թանկությունը: Ու քանի որ նման պատճառաբանությունը ոչ արժանահավատ է, թույլ տվեք նաև հարցնել, թե ինչ նպատակներ ունի ոսկի և արծաթ վաճառելը, կամ՝ ինչ նպատակներ է նախատեսում ֆինանսների նախարարությունը ստանալիք գումարների մասով»:
Ֆինանսների նախարարի տեղակալ Արմեն Հայրապետյանը պատասխանել է. «Panorama.am-ի հարցադրման հետ կապված, թե՝ որոնք են այն ապրանքները, որ իրենց արդիականութունը կորցնում են և, հետևաբար՝ իրենց արժեքը: Մենք արդեն 2016 թվականին նման իրավիճակի հանդիպել ենք և փորձել ենք իրացնել արհեստական աճեցված մարգարիտներ՝ գինը սահմանելով շուկայական, այսինքն՝ 1 գրամի համար 60 դրամ, այնուամենայնիվ, հնարավոր չի եղել իրացնել անգամ 1 գրամ մարգարիտ: Ինչը մեզ բերեց այն համոզման, որ կան նմանատիպ արհեստական այլ քարեր, բնական քարեր, որոնց իրացումը շատ ավելի լուրջ խնդիր է և արժեքային փոփոխութունների է ենթարկվել նվազման ուղղությամբ, ինչով պայմանավորված մենք, բնականաբար, փորձելու ենք իրացնել այն ապրանքները, որոնք իրենց արժեքը ավելի արագ են կորցնում : Որևէ նպատակ չի դրված ամեն գնով իրացնել թանկարժեք քարերը և մետաղները: Թանկարժեք քարերի իրացման համար նվազագույն շեմ է սահմանված՝ դա միջազգային մետաղների գներն են ոսկու, արծաթի համար: Իսկ մյուս քարերի համար մեր ներքին շուկայում գնահատված գինն է լինելու: Անգամ ունենք վերապահում, որ եթե մի օր առաջ գնահատված գնից 5 տոկոս և ավել տատանում լինի, այդ դեպքում այն նորից վերագնահատվելու է աճուրդից առաջ: Այսինքն՝ բոլոր այն թիրախավորումները, որ ամեն գնով փորձելու ենք իրացնել՝ այդպես չի, ուզում եմ հուսախաբ անել:
Իրացումը ինքը շատ բարդ խնդիր է: Եթե մեզ հաջողվի իրականացնել ադ ծրագիրը և իրացնել շուկայական գնով, իրացված միջոցները վերաձևակերպել, կամ ձեռք բերել նոր, այնպիսի ակտիվներ, որոնք միշտ արդիական են և գործարքներ իրականացնելիս իրացվելիության բարձր պահանջարկ ունեն, այդ դեպքում մենք հնարավորություն կունենանք ունենալու ավելի որակյալ պահուստային միջոցներ, որոնք ծառայեն այն նպատակի համար, որ նախատեսված է՝ արտակարգ իրավիճակներում ունենալ լրացուցիչ հնարավորություն, օգտագործել այդ մետաղների, զարդերի իրացման հնարավորությունը այլ խնդիրներ լուծելու համար»:
Այսպիսով՝ մեզ ուղարկված պատասխանի մեջ որոշակի նպատակ չի նշված, իսկ թանկարժեք մետաղների «պահման թանկության մասին» նախարարի հայտարարությունը պետք է հասկանալ երևի թե այսպես՝ պահելը թանկ է, որովհետև դրանք... էժանանո՞ւմ են: Կամ՝ ի՞նչը կարող է լինել ավելի ունիվերսալ պահուստային միջոց, քան ոսկի-արծաթ-ադամանդն է: Սպասենք «այլ խնդիրներին», տեսնենք լուծումը:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին