Ավստրիայի Բաումգարտեն խոշորագույն կենտրոնում գազի տարանցումը լիովին վերականգնվել է: Այս մասին ORF ռադիոյի հետ հարցազրույցում հայտնել է Gas Connect Austria գազատրանսպորտային համակարգի ընկերություն-օպերատորի տնօրեն Հարալդ Շտինդլը:
Վերջինիս փոխանցմամբ՝ ընկերությունում կարծում են, որ պայթյունը տեղի ունեցել տեխնիկական անսարքության պատճառով: «Բաումգարտենում նոր սարքավորումներ էին տեղադրում... Բայց սա միայն մեր վարկածն է, որ տեխնիկական անսարքությունը առաջացել է զատիչ մեքենաներից մեկում: Եվ այս տեխնիկական անսարքությունը որոշ լրացուցիչ հանգամանքների հետ մեկտեղ հանգեցրել է պայթյունի եւ հրդեհի»,- ասել է Շտինդլը`հավելելով, որ եւ ընկերությունը, եւ ոստիկանությունը սկսել են հետաքննություն:
Հիշեցնենք, որ երեքշաբթի առավոտյան Բաումգարտենում գտնվող OMV գազային կենտրոնում պայթյուն էր որոտացել, ինչի հետեւանքով դադարեցվել էր գազի տարանցիկ մատակարարումը դեպի Իտալիա, Սլովենիա եւ Հունգարիա: Պայթյունի հետեւանքով զոհվել էր 1 մարդ, ավելի քան 20-ը վիրավորվել էին:
Ավստրիայում տեղի ունեցած պայթյունից հետո ընդհատվել էր գազի մատակարարումը որոշ եվրոպական երկրներ
Ավստրիայում գազի բաշխիչ կայանում տեղի ունեցած պայթյունի հետեւանքով մեկ մարդ է զոհվել