Մենք այս տարի հայտարարել ենք, որ խաղողը մթերում ենք 130-180 դրամով՝ կախված խաղողի տեսակից, որակից, կարկտահարության աստիճանից, շաքարի տոկոսից, տեղում որոշվում է ամեն ինչ, մթերում ենք։
Մասնաճյուղերում նորմալ մթերվում է խաղողը։ Թե այս աժիոտաժն ինչի՞ հետ է կապված մենք այդպես էլ չհասկացանք։ Այս մասին «Առաջին լրատվական»-ի հետ զրույցում հայտարարեց Պռոշյանի կոնյակի գործարանի փոխտնօրեն Վարազդատ Եսայանը։
«Հայտարարություններն արված են, թե որ սորտը ինչ գնով է մթերվում։ 180-ից բարձր չենք մթերում։ Գյուղացիների հետ պայմանագրերում կետ կա, որ գինը 160 դրամ է։ Մենք երեկ 160-վ էլ ենք մթերել, 130-ով էլ, 180-ով էլ ենք մթերով»,- ասաց փոխտնօրենը, ապա անդրադառնալով Երևանի կոնյակի գործարանի հայտարարությանը, թե իրենց համար խաղողի մթերման առավելագույն գինը 140 դրամն է, ավելացրեց՝ իրենց գնային քաղաքականությունը կապ չունի Կոնյակի գործարանի հայտարարության հետ։
Պռոշյանի կոնյակի գործարանի փոխտնօրենի համար անհասկանալի է, թե ինչո՞ւ է իրենց գործարանի անունը հիշատակվում խաղողագործների կողմից, քանի որ նրա վստահեցմամբ, իրենց գործարանում երբևէ խնդիր չի եղել։
Մեր հարցին՝ ի՞նչ պետք է անել, որպեսզի ամեն տարի խաղողի մթերման գնի հետ կապված խնդիրներ չառաջանան, արդյո՞ք իրենք Կառավարության, պատկան մարմինների մոտ բարձրացրել են այս հարցը, որ սահմանվի մեխանիզմ, գնացուցակ, թե ո՞ր տեսակի խաղողն ի՞նչ գնով պետք է մթերել և ըստ դրա աշխատել, Պռոշյանի կոնյկաի գործարանի փոխտնօրենը դժվարացավ պատասխանել, չնայած որ հարցը իր համար ևս կարևոր էր։
Հիշեցնենք՝ Արմավիրի մարզի տասնյակ համայնքների խաղողագործներ երեկվանից բողոքի ակցիա են իրականացնում՝ պահանջելով խաղողի մթերման գնի վերանայում։ Վերամշակող գործարանները խաղողն ընդունում են 130-140 դրամով, գյուղացիների պնդմամբ, որն իրենց ձեռք չի տալիս։ Խաղողի ինքնարժեքը սահմանվել է 110 դրամ, մթերումը՝ 140, ստացվում է գյուղացուն եկամուտ մնում է 30 դրամ, որով ընտանիք պահել հնարավոր չէ, ուր մնաց նորից այգի ստեղծել, խաղող մշակել, վարկեր փակել։
Մանրամասները՝ տեսանյութում