Կառավարությունը քննարկում է մարզերում տարածքային կառավարման հայեցակարգ
ԵՐԵՎԱՆ, 2 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի կառավարությունը քննարկում է մարզերում տարածքային կառավարման հայեցակարգ: Ազգային ժողովում ՀՀ 2018թ. պետական բյուջեի նախագծի քննարկմանն այս մասին ասաց ՀՀ տարածքային կառավարման և զարգացման նախարար Դավիթ Լոքյանը: «Մենք ուսումնասիրել ենք միջազգային փորձը, թե ինչպիսին պետք է լինի տարածքային կառավարումը մարզերում և կառավարություն ենք ներկայացրել համապատասխան հայեցակարգ»,- «Արմենպրես»-ի փոխանցմամբ՝ նշեց նա:
Լոքյանը մանրամասնեց, որ հայեցակարգով նախատեսում են մարզպետներին տալ տնտեսական զարգացման պարտավորություններն ամբողջությամբ, նրանք ունենալու են հիմնադրամ, որի մեջ լինելու է զարգացման վարչությունը՝ ՓՄՁ-ի մարզային կառույցները, որոնք կենթարկվեն ուղղակի մարզպետներին:
Նախարարի խոսքով՝ մյուս լիազորությունները, որ մարզպետներն ունեն այսօր՝ կրթության, սոցիալական, առողջապահության ոլորտներում պահպանվում են. «Կրթական համակարգում, օրինակ՝ շենքերի պահպանման հարցը կլինի համայնքի ղեկավարների լիազորությունը: Բացի այդ, մարզպետին կից ստեղծվում է մարզի խորհուրդը, որի մեջ մտնում են խոշորացված համայնքների ղեկավարները»,-ասաց նա:
Դավիթ Լոքյանը նաև հայտնեց, որ հայեցակարգը վերջնական չէ՝ շեշտելով, որ դրա վերաբերյալ առաջարկները նոր են ստանում:
Բաժանորդագրվեք մեր ալիքին Telegram-ում