Իմ պաշտոնավարման ավելի քան 1,5 տարվա ընթացքում սա առաջին նման ահազանգն է: «Առաջին լրատվական»-ի հետ զրույցում այս մասին ասաց Կոտայքի մարզպետ Ռոմանոս Պետրոսյանը՝ անդրադառնալով Ծաղկաձորում օտարերկրյա հանգստացողներից մեկի բողոքին, որ գիշերները ոսկե երիտասարդությունը, քրեական տարրերը հաճախ են վեճեր սարքում, բայց չի հանդիպել ոստիկանի, որը կկանխի նման դրսևորումները:
«Ոստիկանության Կոտայքի մարզային վարչությունը ունի Հրազդանի առանձին բաժին և Ծաղկաձորի բաժանմունք: Եթե վերջին տարիներին այցելել եք Ծաղկաձոր, նկատած կլինեք՝ հենց Կեչառիսի եկեղեցական համալիրի կողքը ամենօրյա ռեժիմով ոստիկանական մեքենան պարեկային հերթապահություն է իրականացնում, ինչպես նաև գիշերային հերթապահություն է իրականացնում քաղաքում: Այսինքն՝ բոլոր պարագաներում ես կարող եմ երաշխավորել, որ Ծաղկաձորում, որպես նաև տուրիստական ինդուստրիայի կարևորագույն կենտրոն, պատկան մարմինները հավուր պատշաճի հերթապահություն են իրականացնում: Իմ պաշտոնավարման ավելի քան 1,5 տարվա ընթացքում սա առաջին նման ահազանգն է: Ես չգիտեմ, թե որքանով է այն օբյեկտիվ: Ես ինքս մեկ անգամ ևս ոստիկանության մարզային վարչության պետի հետ կխոսեմ այդ մասին՝ հասկանալու համար, թե ինչու պետք է նման ահազանգ լինի»,- ասաց մարզպետը:
Հարցին, թե արդյոք ոստիկանության աշխատակիցների բարեփոխման անհրաժեշտություն տեսնո՞ւմ է, նա պատասխանեց. «Գլոբալ առումով, այո, տեսնում եմ, վարչապետն ինքն էլ է տեսնում, նույնիսկ աշխատանքային խումբ է ձևավորվել բարեփոխումներ իրականացնելու համար:
Բնականաբար, ես իմ քաղաքական թիմի տեսակետը լիարժեքորեն կիսում եմ, որ իրավապահ համակարգի ամբողջական բարեփոխման անհրաժեշտություն կա»:
Ինչ վերաբերում է մարզում քրեական ենթամշակույթ կրող անձանց ակտիվությանը, որի մասին ինքը բարձրաձայնել էր դեռ Աբովյանի ընտրությունների ժամանակ, Ռոմանոս Պետրոսյանն ասաց. «Վերջին շրջանում առանձնակի դրսևորումներ ի հայտ չեն եկել քրեական ենթամշակույթ կրող շրջանակների կողմից, բայց հիմա էլ ոստիկանության մարզային վարչությունը բավականաչափ օպերատիվ և կոմպետենտ է այդ հարցում, և թե՛ իմ կողմից, թե՛ քաղաքացիների կողմից դրա հետ կապված ցանկացած ահազանգի անմիջապես գնահատական է տրվում: Ես ինքս էլ մշտական կապի մեջ եմ իրենց աշխատակազմի հետ: Վերջերս նաև ինձ մոտ էր Կոտայքի վարչական տարածքը սպասարկող ՃՈ սպայակազմը, որի հետ քննարկեցինք նաև ճանապարհներին, հատկապես Հրազդանում և Աբովյանում, կարգուկանոնի հաստատման անհրաժեշտության հարցը»:
Լուսանկարը՝ Armeniasputnik-ի