ՀՀ գլխավոր դատախազի նախկին տեղակալ Գագիկ Ջհանգիրյանը դիմել է վարչական դատարան՝ պահանջելով առոչինչ ճանաչել իրեն կոչումներից զրկելու և զբաղեցրած պաշտոնից ազատելու ՀՀ նախագահի 2008 թվականի փետրվարի 23-ի թիվ ՆՀ-28-Ա և ՆՀ-29-Ա հրամանագրերը։ Գործը մակագրվել է դատավոր Ալեքսանդրա Հարությունյանին։
Հիշեցնենք, որ Ջհանգիրյանը, լինելով գլխավոր դատախազի տեղակալ, 2008 թվականի փետրվարի 22-ին ելույթ է ունեցել ՀՀ նախագահի թեկնածու Լևոն Տեր-Պետրոսյանի՝ Ազատության հրապարակում տեղի ունեցած հանրահավաքի ժամանակ, մինչդեռ օրենքն արգելում էր դատախազներին զբաղվել քաղաքականությամբ։ Նրա գործողությանն անմիջապես արձագանքել էր դատախազությունը և նույն օրը միջնորդություն ներկայացրել ՀՀ նախագահին՝ Ջհանգիրյանին զբաղեցրած պաշտոնից ազատելու և դատախազության համակարգից հեռացնելու համար՝ նկատի ունենալով, որ նա «կոպտորեն խախտել է» «Դատախազության մասին» օրենքի պահանջը։
Գագիկ Ջհանգիրյանը «Առաջին լրատվական»-ի հետ զրույցում ասաց, որ չի մեկնաբանում իր հայցադիմումը՝ ի պատասխան մեր այն հարցին, թե իր նպատակը Քոչարյանի պահանջը առոչինչ ճանաչելն է, թե ցանկանում է նաև վերադառնալ համակարգ։
ՀԱԿ իրավական հարցերով պատասխանատու Արմեն Խաչատրյանն «Առաջին լրատվական»-ի հետ զրույցում ասաց, որ հայցադիմումի հիմքն ու առարկան Ռոբերտ Քոչարյանի ապօրինի հրամաններն են և դրանք առոչինչ ճանաչելու պահանջը.«Միշտ կարելի է մութ սենյակում սև կատու փնտրել, բայց այս պարագայում մենք գործ ունենք իրավական գործընթացի հետ, դատական վարույթի հետ։ Ընդ որում դատարանը դեռ վարույթ էլ չի ընդունել պարոն Ջհանգիրյանի հայցադիմումը։ Ամեն դեպքում մի բան հստակ է, որ հայցի առարկան ու պահանջը Ռոբերտ Քոչարյանի ապօրինի հրամանները առոչինչ ճանաչելն է»,-ասաց Խաչատրյանը։
Այսինքն Գագիկ Ջհանգիրյանի հայցադիմումը և դրա հնարավոր բավարարումը դատարանի կողմից չի՞ ենթադրում նախկին պաշտոնի վերականգնում, Խաչատրյանը նշեց.«Այդ հայցադիմումը եթե բավարարվի, ապա Քոչարյանի երկու հրամանները կճանաչվեն առոչինչ։ Վարչական դատավարությունը նաև ունի ածանցյալ հետևանքների վերացում հասկացություն, բայց ես որքանով տեղյակ եմ հայցադիմումում ածանցյալ հետևանքների վերացման մասով պահանջ ներկայացված չէ։ Բայց նման հետևանքներ կարող են լինել դատախազական թոշակ ստանալու իրավունքի վերականգնում և այլն, որոնք առաջացել են ոչ իրավաչափ որոշումների հետևանքով»։
Մեր դիտարկմանը՝ պաշտոնին վերականգնվելը ևս՞ ածանցյալ հետևանք է. Խաչատրյանը պատասխանեց.«Ուղակի իմաստով՝ ոչ։ Նախկինում զբաղեցրած պաշտոնին վերականգնվելու համար նման պահանջ պետք է ներկայացվեր հայցադիմումում։ Օրինակ նշվեր՝ անվավեր ճանաչել նախկին հրամանները և վերականգնել նախկին աշխատանքում։ Իսկ Ջհանգիրյանի հայցադիմումի պահանջը մեկն է՝ առոչինչ ճանաչել Քոչարյանի երկու հրամանը։ Այլ պահանջ չկա հայցադիմումում ներկայացված։ Դատարանը գործը վարույթ կընդունի, դատաքննություն կսկսվի ու բոլորը հնարավորություն կունենան մասնակցելու դատավարությանը և ստանալ իրենց հետաքրքրող հարցերի պատասխանները»։
Նշենք, որ երեկվանից մամուլն արդեն գրում է, որ դատախազությունում խուճապային տրամադրություններ են Ջհանգիրյանի հայցադիմումի ֆոնին, ինչպես նաև, որ Գլխավոր դատախազ Արթուր Դավթյանը հնարավոր է մինչև հունվար հրաժարական ներկայացնի։ Սակայն ՀՀ գլխավոր դատախազի խորհրդական Գոռ Աբրահամյանն արդեն անդրադարձել է այդ լուրերին՝ նշելով, որ «Զառանցագին, բամբասանքային տեղեկությունները չեն մեկնաբանում: Գլխավոր դատախազը շարունակում է իր բնականոն աշխատանքը»:
Լուսանկարը՝ Armeniasputnik-ի