Հունվարի 24-ին Երևանի գլխավոր ճարտարապետ Արթուր Մեսչյանն իր ասուլիսի ժամանակ հայտարարեց, որ քաղաքապետարանը նպատակ ունի կյանքի կոչել ռազմավարական 2 ծրագիր՝ Երևանի մետրոպոլիտենի երկու նոր կայարանների և ճոպանուղու կառուցումը: «Խոսքն Աջափնյակի մետրոյի 2 կայարանների մասին է: Ֆինանսական բավականին մեծ ծախսեր են՝ կապված այս կառույցների հետ, մենք ուզում ենք սահմանափակվել ամենաստրատեգիական գծով՝ կապենք քաղաքը Աջափնյակի հետ: Հետագայում դա կշարունակվի դեպի Դավթաշեն, բայց դա արդեն կլինի մի փոքր հետո: 2-րդ կարևոր ծրագիրը ճոպանուղին է, որը պետք է Նորքը կապի քաղաքի կենտրոնին: Ճոպանուղին շատ ավելի արագ կստացվի իրագործել, որովհետև գումարային առումով այն շատ ավելի համեստ է մետրոյի համեմատ: Խնդիրները շատ-շատ են: Ամենակարևորը՝ ինչքանով են դրանք ռեալ, կարող եմ ասել՝ ռեալ են, ուղղակի պետք է աշխատել: Կարծում եմ՝ այս հարցում մեզ կօգնի Քաղաքաշինության կոմիտեն և կառավարությունը: Եվ մենք կկարողանանք այս կարևորագույն խնդիրները տանել առաջ»,- նշել էր Երևանի գլխավոր ճարտարապետը:
Քաղաքապետարանում, սակայն, պարզվում է՝ այսքան ոգևորված չեն այս ծրագրերի իրականացմամբ։ Անդրադառնալով ծրագրի մանրամասներին՝ քաղաքապետարանից նշում են, որ այս պահին այլ տեղեկություններ, քան Երևանի գլխավոր ճարտարապետ Արթուր Մեսչյանի ասուլիսի ընթացքում հնչածները, չկան: Լինելուն պես դրանք կհրապարակվեն։
Նշենք, որ մետրոյի նոր կայարան կառուցելու վերաբերյալ հունվարի 12-ին էլ քննարկում էր եղել Հանրային խորհրդի Ֆինանսատնտեսական-բյուջետային հարցերի հանձնաժողովի տրանսպորտային ենթակառուցվածքների և շինարարության հարցերի ենթահանձնաժողովում։ Քննարկմանը մասնակցել էր նաև Երևանի գլխավոր ճարտարապետ Արթուր Մեսչյանը: Նախնական քննարկումներում՝ մետրոյի երկու կայարան կառուցելու համար 70-75 միլիոն դոլար է հարկավոր։
Երևանի ավագանու ընդդիմադիր «Լույս» խմբակցության ղեկավար Դավիթ Խաժակյանն «Առաջին լրատվական»-ի հետ զրույցում ասաց, որ տեղեկություններ նախագծերի, տարվող աշխատանքների մասին չունի, բայց մի բան հստակ է, որ հնգամյա զարգացման ծրագրում նշված է, որ պետք է կառուցվի մետրոպոլիտենի առնվազն մեկ նոր կայարան և դա պարտավոր են իրականացնել 5 տարվա ընթացքում։ «Այս ծրագրային կետին մենք հետևելու ենք, քանի որ այն արդեն իսկ ներառված է հնգամյա զարգացման ծրագրում, դրանց նախագծային արժեքները շար մեծ գումար են ենթադրում և դեռ հայտնի չէ, թե այդ ուղղությամբ ինչ աշխատանքներ են տարվում»,- ասաց Խաժակյանը։
Ինչ վերաբերում է ճոպանուղուն, ապա Խաժակյանն ասաց, որ քաղաքը ժամանակին ստացել է դրամաշնորհ՝ հետազոտելու ճոպանուղու նպատակահարմարությունը և ուղղությունները. «Սա, կարծում եմ, իրատեսական է, որովհետև ճոպանուղի հնարավոր է կառուցել՝ դիտարկելով դրա եկամտաբերությունը։ Իսկ մետրոն թանկ ենթակառուցվածք է և միանշանակորեն միակողմանի բեռ է քաղաքի կամ պետության համար։ Ամեն դեպքում, հնգամյա զարգացման ծրագրով գոնե մեկ կայարանի կառուցում նախատեսված է և, կարծում եմ, իշխանությունը պետք է իր խոստումը պահի»,- ընդգծեց Խաժակյանը՝ ավելացնելով, որ նախնական հաշվարկներով 70-75 միլիոն դոլարը հաշվարկված է այն կայարանի համար, որը ներկայումս տեղակայված է Հալաբյան փողոցի վրա, աշխատանքները նախկինում արված են և դրա վերաբացումը իրատեսական է, բայց նոր կայարանի կառուցման արժեքը 3-4 անգամ ավելի մեծ է, քան նշված գումարը։
Ինչ վերաբերում է այս ռազմավարական ծրագրերի իրականացման ֆինանսավորմանը, ապա, Խաժակյանի խոսքերով, հնարավոր է ներգրավել միջազգային կազմակերպություններից գումարներ, բայց, հաշվի առնելով, որ այդ ենթակառուցվածքը թանկ է և իր ծախսերը դժվար փոխհատուցելի են, ապա այս ոլորտում մասնավոր ներդրումները դժվար հավանական է։ «Բայց կարծում եմ, որ սրա մասին առաջին հերթին պետք է խոսի քաղաքային իշխանությունը, ասի, թե ինչ միջոցներից է նախատեսում դա իրականացնել»,- ընդգծեց Խաժակյանը։