«Ռիչարդ Միլսն ուղիղ ասեց այն, ինչ-որ Մադրիդյան սկզբունքներում է գրված» (տեսանյութ)
«Գրավյալ տարածքներ հասկացություն չկա»,- այսպես արձագանքեց Դեմոկրատական կուսակցության նախագահ Արամ Սարգսյանը Հայաստանում ԱՄՆ նախկին դեսպան Ռիչարդ Միլսի EVN Report-ին տրված հարցազրույցին, թե Արցախյան հակամարտության հարցի կարգավորումն առանց «գրավյալ տարածքների որոշակի մասի վերադարձի» չի կարող լինել: Ըստ Արամ Սարգսյանի՝ այդ հայտարարությանը արձագանքած Նիկոլ Փաշինյանի պատասխանը զարմանալի էր. «Ի՞նչ է նշանակում հեռացող դեսպանի հայտարարությունը կարելի է համարել հեռացող մեսիջ: Ոչ թե հեռացող դեսպան է, այլ ԵԱՀԿ Մինսկի խմբի համանախագահ երկրի ներկայացուցիչ, որը արտահայտում է 3 համանախագահների, երևի թե, համաձայնեցված դիրքորոշումը»: Արամ Սարգսյանը պնդում է, որ չկա որևէ քաղաքական ուժ, որը հայեցակարգային մոտեցում ցուցաբերի Արցախի հիմնահարցի նկատմամբ: Ադրբեջանի ախորժակը օր օրի մեծանում է: «Հայաստանի Ազգային ժողովը պարտադիր պետք է ընդունի գոնե մեկ որոշում, առ այն, որ Արցախի Հանրապետությունը ձևավորվել է օրինական ճանապարհով, միջազգային իրավունքի նորմերին համապատասխան և դրանով չի խախտել Ադրբեջանի տարածքային ամբողջականությունը»: Իրավապաշտպան Լարիսա Ալավերդյանն էլ վիրավորական համարեց հեռացող դեսպան հասկացությունը: «Մեր իշխանությունը պետք է փոխի իր հռետորաբանությունը: Խոսքը դոկտրին է, չի կարելի վիրավորել այդպիսի բարձրաստիճան, և մեծ լումա ներդրած ամերիկյան քաղաքականությունը տարածելու մեջ անձի նկատմամբ»: Լարիսա Ալավերդյանն ընդգծեց, որ իշխանափոխության հետևանքով անխուսափելի էր Ղարաբաղյան հարցի ակտիվացումը: «Դեսպանն ուղիղ ասեց այն, ինչ-որ Մադրիդյան սկզբունքներում է գրված: Մադրիդյան սկզբունքներն երևանյան անսկզբունքայնության արգասիքն է»:
