Ամփոփելով հետհեղափոխական շրջանը և անդրադառնալով դանդաղկոտության և կադրերի աշխատանքի ոչ էֆեկտիվության պատճառով իշխանությունների հասցեին հնչող քննադատություններին՝ «Առաջին լրատվական» հետ զրույցում հրապարակախոս Արա Նեդոլյանը նշեց. «Տարբերակ Ա-ից, որը արագ և վճռական բարեփոխումներն էին, մենք անցել ենք տարբերակ Բ-ի, երբ հասարակությունը պետք է սկսի աղաղակել և պահանջել, որ բարեփոխումները սկսեն արդյունավետ տեղի ունենալ: Իսկ ինչու են դանդաղ ընթանում. իմ կարծիքով՝ դիրքերի նախապատրաստում է տեղի ունենում՝ հետագա ակտիվ գործողությունների համար, որոնց ընթացքում սահուն առաջընթաց կլինի որոշ ոլորտներում, կամ հոգեբանական նախապատրաստում է տեղի ունենում, որ հնարավոր է հանդգնել, կյանքը փոխել և ապրել ուրիշ կերպ…
Բայց այդ գիտակցությունը դեռ ձևավորման երկրորդ փուլ է պահանջում: Առաջին փուլում տեղի ունեցավ լիցքաթափում, այլևս պետական ապարատը չի ծառայում չարիքին, չի ծառայում դեստրուկտիվ դերակատարման… Հիմա պետք է հասկանալ, թե ինչես կարող է այդ ապարատը ծառայել դրական փոփոխություններին, այդ հասկացողությունը չի շոշափվում, և դա ճնշող տպավորություն է թողնում: Բայց այն, որ այլևս պետության անկում չկա, դա հնարավորություն է տալիս պատկերացնել, թե ինչ է կարելի…»:
Անդրադառնալով հարցին, թե արդյոք սիրո և հանդուժողականության հեղափոխությունից ավելի քան մեկ տարի անց ունենք հանդուրժող հասարակություն՝ հաշվի առնելով, որ կան հեղափոխականներ և հակահեղափոխականներ, հրապարակախոսը նշեց. «Իշխանության կողմից իրականացվող սիրո և հանդուրժողականության քաղաքականությունը խնդիր է այն իմաստով, որ չեն կատարվում կտրուկ քայլեր: Ես կցանկանայի տեսնել Սաակաշվիլու նման կտրուկ կերպար, որը մեկ օրում 40 հազար ոստիկան ուղարկեց թոշակի, բայց Նիկոլն այլ բան է խոստացել, նա խոստացել է, որ պարտվածներ չեն լինելու և դեռ կատարում է իր խոստումը… Հին համակարգի շահառուները պետք է իրենց պարտված զգան»: Հրապարակախոսը նաև հավելեց, որ վարչապետի այսօրվա քայլերն ուղղվածեն նրան, որ հետագայում ռևանշիստական շարժում չառաջանա:
Մանրամասն՝ տեսանյութում:
