Ֆուտբոլի Հայաստանի ազգային հավաքականը Ազգերի լիգայի խաղարկության խմբային փուլի երրորդ տուրում հոկտեմբերի 11-ին Երևանում պետք է մրցի հարևան Վրաստանի ազգային թիմի հետ։ Այս պահին հանդիպման վայրի փոփոխության վերաբերյալ պաշտոնական որոշում չկա։ Հիշեցնենք, որ այսօր Երևանում պետք է կայանար Եվրոպա լիգայի փլեյ-օֆֆի «Արարատ-Արմենիա»-«Ցրվենա Զվեզդա» մրցավեճը։ Խաղից երկու օր առաջ, սակայն, ՈՒԵՖԱ-ն, այնուամենայնիվ, որոշում կայացրեց Եվրոպա լիգայի փլեյ-օֆֆ փուլի հանդիպումը Երևանում չանցկացնելու մասին։ Եվրոպական ֆուտբոլային կառույցը մասնավորապես հաշվի էր առել սեպտեմբերի 28-ի առավոտյան Ադրբեջանի զինված ուժերի կողմից ՀՀ տարածքում գտնվող Վարդենիսի շրջանի գյուղերի հրետակոծման փաստը: Ըստ ՈՒԵՖԱ-ի՝ այս պահին մեր երկրում միջազգային ֆուտբոլային հանդիպում անցկացնելն անվտանգության առումով նպատակահարմար չէ։
Նշենք, սակայն, որ Սերբիայի չեմպիոնը պատրաստակամություն էր հայտնել ժամանել Երևան։ «Ցրվենա Զվեզդայի» գլխավոր տնօրեն Զվեզդան Տերզիչը հայտարարել էր, որ իրենք պատրաստ են խաղալ Հայաստանի մայրաքաղաքում։ «Հավատում եմ, որ ՈՒԵՖԱ-ն կուսումնասիրի մրցող թիմերի անվտանգության հետ կապված խնդիրները և համապատասխան որոշում կկայացնի: Ես կարծում եմ, որ այս դիմակայությունը պետք է Հայաստանում տեղի ունենա: Մենք չենք ցանկանում օգտվել հայ ժողովրդի համար այս բարդ իրավիճակից և փոխել խաղի անցկացման վայրը: Վիճակահանության արդյունքում պետք է խաղանք դրսում. ուրեմն կգնանք և այնտեղ էլ կխաղանք»,- Dnevnik պարբերականի թղթակցին հայտնել էր Տերզիչը։ Հայաստան ժամանելու մտադրության մասին հայտարարել էր նաև «Ցրվենա Զվեզդայի» գլխավոր մարզիչ Դեյան Ստանկովիչը։ «Մենք չէինք մտածում, թե որտեղ ենք խաղալու: Մենք նախապատրաստվում էինք խաղին ամենանորմալ ձևով, ու պատրաստվում էինք խաղալ Հայաստանում: Անակնկալ կերպով իրավիճակը ժամ առ ժամ սկսեց փոխվել, ու վերջում Կիպրոս մեկնելու որոշում կայացվեց»,- նշել էր սերբ մասնագետը։
«Ցրվենա Զվեզդայի» Հայաստան գալու պատրաստակամությունը, ինչ խոսք, բարեկամական և մարդասիրական քայլ կարելի է համարել։ Իսկ ի՞նչ որոշում կկայացնի Վրաստանը։ Այս երկրի ազգային թիմի գլխավոր մարզիչ Վլադիմիր Վայսը հրաժարվել է պատասխանել հարցին Հայաստանի հավաքականի հետ առաջիկա խաղի վերաբերյալ՝ պնդելով, որ այս պահին մտածում է միայն ԵՎՐՈ 2020-ի որակավորման փուլի Բելառուսի հետ խաղին մասին: «Ինչո՞ւ եք հարցնում Հայաստանի մասին: Մեր բոլոր ուժերը ու ամբողջ ուշադրությունը նախ և առաջ կենտրոնացած է Բելառուսի հետ խաղի վրա: Միայն հետո Ազգերի լիգա, Հայաստանի ու Հյուսիսային Մակեդոնիայի հետ խաղերն են: Ինչ վերաբերում է քաղաքականությանը ու անհանգիստ վիճակին, ես այդպիսի հարցերին չեմ պատասխանելու»,- նշել էր Վայսը։ «Արարատ-Արմենիայի» երևանյան հանդիպման ՈՒԵՖԱ-ի որոշումից հետո հայտարարությամբ էր հանդես եկել նաև Հայաստանի ֆուտբոլի ֆեդերացիան, որում մասնավորապես ասված էր. «Հաշվի առնելով մի շարք հանգամանքներ, մասնավորապես, այսօր առավոտյան Ադրբեջանի կողմից Հայաստանի Հանրապետության՝ միջազգայնորեն ճանաչված տարածքների ռմբակոծումը, Հայաստանի չեմպիոն «Արարատ-Արմենիայի»՝ ՈՒԵՖԱ Եվրոպա լիգայի որակավորման փլեյ-օֆֆ փուլում սերբական «Ցրվենա Զվեզդայի» հետ հանդիպման վայրի տեղափոխությունը Կիպրոս, այսօրվանից սկսած՝ ՀՖՖ հովանու ներքո անցկացվող բոլոր մրցաշարերը դադարեցվում են անորոշ ժամկետով: Ըստ այդմ՝ հետաձգվում են նաև VBET Հայաստանի Պրեմիեր լիգայի՝ սեպտեմբերի 30-ին նախատեսված բոլոր հանդիպումները: Լրացուցիչ տեղեկատվություն կհաղորդենք հաջորդիվ»։
Հիշեցնենք, որ ՀՖՖ-ն իր հովանու ներքո անցկացվող մրցաշարերի դադարեցման մասին հայտարարություն տարածել էր դեռևս սեպտեմբերի 27-ին։ Մեկ օր անց, սակայն, ՀՖՖ-ն փոխել էր որոշումը՝ նշելով, որ չնայած Ադրբեջանի կողմից Արցախի նկատմամբ իրականացվող պատերազմական լայնածավալ գործողություններին՝ մրցավեճերն այնուամենայնիվ կկայանան։ Ավելին, հանդիպումներից առաջ պետք է իրականացվեր #ArtsakhStrong արշավը: Հանդիպումները պետք է սկսվեին լռության րոպեով, իսկ մասնակից թիմերի ֆուտբոլիստները կկրեին սև ժապավեններ:Կարծում ենք՝ պարզ է, որ ՀՖՖ-ն իր հովանու ներքո հանդիպումների վերսկսման վերաբերյալ որոշում էր կայացրել ՈւԵՖԱ-ին ցույց տալու համար, որ մեր երկրում ամեն ինչ նորմալ է, և կարելի է անցկացնել պաշտոնական հանդիպում։ ՀՖՖ-ի որոշման հիմքում «Արարատ-Արմենիա»-«Ցրվենա Զվեզդա»՝ Երևանում հանդիպման անցկացնելն էր։ Ցավոք, մեր ֆուտբոլային գերատեսչության քայլը չստիպեց ՈՒԵՖԱ-ին թույլ տալ մեր երկրում անցկացնել կարևոր միջազգային հանդիպում։
