Հայաստանի ԱԺ Եվրաինտեգրման մշտական հանձնաժողովն այսօր դրական եզրակացություն է տվել Հայաստանի եւ Էստոնիայի կառավարության միջեւ «Հայաստանի Հանրապետության եւ Եվրոպական միության միջեւ` առանց թույլտվության բնակվող անձանց հետընդունման (ռեադմիսիայի) մասին» համաձայնագրի կիրարկման մասին արձանագրությունը վավերացնելու մասին նախագծին:
Միգրացիոն պետական ծառայության պետ Գագիկ Եգանյանը նշեց, որ հիշյալ համաձայնագիրը կարգավորում է, թե ովքեր են ռեադմիսիայով զբաղվող իրավասու մարմինները, ինչ սահմանակետերով պետք է անձի վերադարձը կազմակերպվի եւ այլն: Նրա խոսքով, մի քանի ամիս առաջ նման համաձայնագիր հաստատվել է նաեւ Ֆրանսիայի կառավարության հետ:
«Առանց նմանատիպ հարցերով համագործակցության, ակնկալել, որ կարող ենք ունենալ վիզաների ազատականացում, այդքան էլ ճիշտ չէ, որովհետեւ սա նույն մեդալի երկու հակառակ կողմերն են»,- ընդգծել է Գագիկ Եգանյանը:
Նշենք, որ «ավանդույթի» համաձայն, հանձնաժողովի նիստին ներկա չէին ՀՀԿ-ից Արտակ Սարգսյանը, Արկադի Համբարձումյանը եւ Աշոտ Արսենյանը: