ՀՀ և Ղազախստանի ԱԽ քարտուղարները պայմանավորվել են փոխադարձ այցելությունների մասին
ԵՐԵՎԱՆ, 28 ԱՊՐԻԼԻ, ԱՐՄԵՆՊՐԵՍ: Տաջիկստանի մայրաքաղաք Դուշանբեում ընթացող ՀԱՊԿ Անվտանգության խորհուրդների քարտուղարների կոմիտեի նիստի շրջանակներում ՀՀ անվտանգության խորհրդի քարտուղար Արմեն Գրիգորյանն ապրիլի 28-ին հանդիպել է Ղազախստանի նախագահի օգնական-Անվտանգության խորհրդի քարտուղար Ասետ Իսեկեշևին:
Ինչպես «Արմենպրես»-ին տեղեկացրին ՀՀ ԱԽ գրասենյակից, կանդիպման ընթացքում կողմերը համոզմունք են հայտնել, որ հայ-ղազախական հարաբերություններն ունեն զարգացման լավ հեռանկար՝ հաշվի առնելով երկու ժողովուրդների միջև ջերմ կապերը, որոնք ունեն տասնամյակների պատմություն:
«Քարտուղար Գրիգորյանը իր հերթին ընդգծեց, որ և՛ Հայաստանը և՛ Ղազախստանը անդամակցում են ՀԱՊԿ-ին և Եվրասիական տնտեսական միությանը, և այս հանգամանքը չափազանց կարևոր է երկկողմ համագործակցության հնարավորությունների առումով: Ասետ Իսեկեշևը ընդգծեց, որ Ղազախստանի ավելի քան 11 քաղաքներում գոյություն ունեն հայկական կրթամշակութային կենտրոններ, և հայ համայնքը Ղազախստանում ունի ակտիվ դերակատարություն երկրի կյանքում»,- ասվում է հաղորդագրութայն մեջ:
Ըստ աղբյուրի՝ հանդիպման ընթացքում քարտուղար Գրիգորյանը նշել է, որ Հայաստանը հատուկ ուշադրություն է դարձնում օդատիեզերական արդյունաբերության և ռազմաարդյունաբերության ոլորտների զարգացմանը և բարձր է գնահատում այն փորձը, որ Ղազախստանը կուտակել է այս ոլորտներում։ Նա համոզմունք է հայտնել, որ վերոնշյալ ոլորտներում համագործակցությունը Հայաստանի համար մեծ հետաքրքրություն է ներկայացնում:
Հանդիպման ավարտին կողմերը պայմանավորվել են փոխադարձ այցելությունների մասին:
Բաժանորդագրվեք մեր ալիքին Telegram-ում