Նախագահական ընտրությունների երկրորդ փուլից մի քանի շաբաթ առաջ իշխող «Վրացական երազանք» կուսակցության աջակցությունը վայելող Սալոմե Զուրաբիշվիլիի քարոզարշավը սկսում է կենտրոնանալ մեկ հիմնական թեզի շուրջ` «Թույլ չտանք նախկին իշխանությունների վերադարձը»:
Երեկ Թբիլիսիի կենտրոնում հավաքված հարյուրավոր մարդիկ թեև ֆորմալ առումով կապ չունեին Զուրաբիշվիլիի ընտրարշավի հետ, այդուհանդերձ, ակնհայտ էր, որ գործողությունն առավելապես նախընտրական բնույթ ուներ:
Ակցիայի մասնակիցները որոշել էին հիշել Միխեիլ Սաակաշվիլիի իշխանության տարիների թերևս ամենադրամատիկ իրադարձություններից մեկը` 2007 թվականի նոյեմբերի 7-ի դեպքերը:
11 տարի առաջ այդ օրը վրացական ոստիկանությունը հատուկ միջոցների` արցունքաբեր գազի և ջրցան մեքենաների կիրառմամբ ցրեց Թբիլիսիի կենտրոնական Ռուսթավելի պողոտայում հավաքված հազարավոր մարդկանց, որոնք մի քանի օր շարունակ պահանջում էին նախագահ Սաակաշվիլիի հրաժարականը:
Նույն օրը երեկոյան ոստիկանության հատուկ ջոկատայինները մուտք գործեցին բախումներն ուղիղ եթերում հեռարձակող «Իմեդի» հեռուստաընկերության տարածք` կոտրելով սարքավորումները, իսկ լրագրողներին ու տեխնիկական անձնակազմին դուրս վռնդեցին խմբագրության տարածքից:
Վրացական աղբյուրների պնդմամբ, 2007 թվականի նոյեմբերի 7-ի իրադարձությունների հետևանքով առնվազն 300 խաղաղ ցուցարար էր տուժել:
«Ես ցավում եմ, որ մենք այսօր մի իրավիճակում ենք հայտնվել, երբ Ազգային միացյալ շարժման ղեկավարները ոչ թե բանտում են, այլ մեզ ռևանշով և նոր «Նոյեմբերի 7»-ով են սպառնում: Դա գործող իշխանությունների մեղքն է: Ես հստակ համոզմունք ու որոշում ունեմ` ձեզ հետ միասին թույլ չտալ Ազգային միացյալ շարժման վերադարձն իշխանության», - հայտարարում էր նոյեմբերի 7-ի իրադարձությունների հետևանքով վնասվածքներ ստացած նախկին պատգամավոր Կոբա Դավիթաշվիլին` դիմելով Թբիլիսիի կենտրոնում հավաքված ակցիայի մասնակիցներին:
Իշխող «Վրացական երազանք»-ի ներկայացուցիչները ևս չշրջանցեցին նոյեմբերի 7-ի իրադարձությունների հերթական տարելիցի թեման` խոստանալով, որ իրենց իշխանության օրոք նման բան երբեք չի լինի:
«Նոյեմբերի 7-ի իրադարձությունները նախկին վարչակազմի վերջի սկիզբն ազդարարեցին: Մեր նպատակն է կանխել ավտորիտար համակարգի վերադարձը և թույլ չտալ, որպեսզի Վրաստանի քաղաքացիները պառակտվեն քաղաքական դրդապատճառներից ելնելով», - հայտարարում էր Թբիլիսիի քաղաքապետ Կախա Կալաձեն:
Սաակաշվիլիի կողմնակիցների իշխանության հնարավոր վերադարձի թեման հրատապ դարձավ հոկտեմբերի 28-ին կայացած ընտրությունների առաջին փուլից հետո: Դրա ընթացքում «Վրացական երազանք»-ի կողմնակիցների աջակցությունը վայելող Սալոմե Զուրաբիշվիլին և Ազգային միացյալ շարժման կողմից առաջադրված Գրիգոլ Վաշաձեն գրեթե հավասար թվով քվեներ ստացան` անցնելով երկրորդ փուլ:
Ընդդիմության թեկնածուն երեկ ամեն կերպ փորձում էր չեզոքացնել նախընտրական քարոզարշավում Սաակաշվիլիի իշխանության տարիների ամենավիճահարույց դրվագներից մեկի օգտագործումը իր դեմ:
«Նոյեմբերի 7»-ը նախկին իշխանությունների թույլ տված ամենալուրջ սխալներից մեկն էր և դաս էր բոլոր հաջորդ կառավարությունների համար», - Ֆեյսբուքի իր էջում գրել է Գրիգոլ Վաշաձեն` հավելելով. - «Կառավարությունը պարտավոր է հարգել ցանկացած քաղաքացու տեսակետ` անկախ նրա քաղաքական հայացքներից և տածած համակրանքից: «Իմեդի» հեռուստաընկերություն [ոստիկանության] մուտքն ու հեռարձակումների դադարեցումը խիստ ցավալի էր և որևէ կերպ չի կարող արդարացվել»:
Վրաստանի կենտրոնական ընտրական հանձնաժողովը նախագահական ընտրությունների երկրորդ փուլի քվեարկության օրը դեռ պաշտոնապես չի նշանակել: Վրաստանի Ընտրական օրենսգրքի համաձայն, ԿԸՀ-ն պետք է մինչև նոյեմբերի 17-ն ամփոփի ընտրությունների առաջին փուլի վերջնական արդյունքները: Երկրորդ փուլը կայանալու է այդ ամփոփումից ուղիղ երկու շաբաթ անց: Վրացական մամուլում որպես ընտրությունների ամենահավանական օր նշվում է դեկտեմբերի 2-ը:
