Կորոնավիրուսի տարածումը կարող է տապալել 2020 թվականին նախատեսված ֆուտբոլային կարևորագույն իրադարձությունները։ Մասնավորապես, ամռանը նախատեսված Եվրո-2020-ը ըստ ամենայնի չի կայանա, և ՈՒԵՖԱ-ն Եվրոպայի առաջնությունը 2021 թվական տեղափոխելու մասին պաշտոնական հայտարարություն կանի: Այս մասին գրել է L’Equipe-ը՝ ավելացնելով, որ հայտարարությունը կարվի մարտի 17-ին կայանալիք կոնֆերանսի ժամանակ: ՈՒԵՖԱ-ն կարող է նաև հայտարարել ազգային առաջնությունները ընդհատելու մասին: Մարտի 17-ին կայանալիք կոնֆերանսին մասնակցելու են ՈՒԵՖԱ-ի 55 ասոցիացիաների ներկայացուցիչները: Միջոցառումը տեղի է ունենալու տեսակոնֆերանսի միջոցով:
Երեկ կորոնավիրուսի վերաբերյալ հայտարարություն էր տարածել նաև Հայաստանի ֆուտբոլի ֆեդերացիան, որում մասնավորապես ասված է. «Հաշվի առնելով կորոնավիրուսի տարածման նոր դեպքերը և աշխարհի տարբեր երկրներում մարզական միջոցառումների անցկացման հետ կապված սահմանափակումները՝ հայտնում ենք, որ Հայաստանի ֆուտբոլի ֆեդերացիան ամենօրյա կապի մեջ է ինչպես ՀՀ առողջապահության նախարարության մասնագետների, այնպես էլ ՈՒԵՖԱ-ի գործընկերների հետ: Ըստ այդմ, հայտնում ենք, որ այս պահի դրությամբ Հայաստանի Բարձրագույն և Առաջին խմբերի առաջնությունների հանդիպումների հետաձգման վերաբերյալ որոշում չկա: Հարցը կքննարկվի ևս մեկ անգամ, և կկայացվի համապատասխան որոշում: Ինչ վերաբերում է Հայաստանի ազգային հավաքականի առաջիկա ընկերական հանդիպումներին, ապա ՀՖՖ-ն ամենօրյա կապի մեջ է նաև Ուզբեկստանի և Ղազախստանի ֆուտբոլի ֆեդերացիաների ներկայացուցիչների հետ: Այդ հանդիպումների անցկացման վերաբերյալ վերջնական որոշումը կկայացվի մարտի 17-ին, երբ ՀՖՖ նախագահը մասնակցի ՈՒԵՖԱ-ի ներկայացուցիչների և ՈՒԵՖԱ-ի անդամ ասոցիացիաների նախագահների մասնակցությամբ օնլայն քննարկմանը»։
Մարտի 26-ին Հայաստանի ազգային թիմը Տաշքենդում պետք է մրցեր Ուզբեկստանի, իսկ մարտի 30-ին՝ Ալմաթիում Ղազախստանի ընտրանու հետ։ Հավանականությունը մեծ է, որ այս մրցավեճերը ևս չեն կայանա։ Այսօր հայտարարություն է տարածել նաև Վանաձորի «Լոռի» ֆուտբոլային ակումբը՝ իր մտահոգությունը հայտնելով կորոնավիրուսի տարածման հետ կապված: Ակումբը կոչ է անում ժամանակավորապես դադարեցնել Հայաստանի առաջնության հանդիպումները, այլապես ինքնուրույն որոշում կկայացնի՝ մասնակցե՞լ առաջիկա տուրին, թե՞ ոչ։
«Մեր ակումբի դիրքորոշման հիմքում առաջնայինը մարդու առողջությունն է և նրա անվտանգությունը։ Ստեղծված իրավիճակում «Լոռի ՖԱ»-ն հորդորում է ֆուտբոլային ընտանիքին կայացնել ճիշտ որոշում և ժամանակավորապես դադարեցնել ՀՀ առաջնության հանդիպումները, ինչպես դա արել են աշխարհի գերակշռող երկրներում։ Հակառակ դեպքում մեր ակումբը կքննարկի բոլոր հնարավոր ռիսկերը և անվտանգության նկատառումներից ելնելով կկայացնի ինքնուրույն որոշում՝ մասնակցե՞լ առաջիկա տուրի խաղին, թե՞ ոչ»,- ասվում է ակումբի տարածած հաղորդագրության մեջ:
Երեկ ՈՒԵՖԱ-ն հաղորդագրություն տարածեց, ըստ որի՝ ֆուտբոլի Չեմպիոնների լիգայի 1/8-րդ եզրափակչի «Մանչեսթեր Սիթի»-«Ռեալ Մադրիդ» և «Յուվենտուս»-«Լիոն» հանդիպումները հետաձգվել են։ ՈՒԵՖԱ-ի պաշտոնական կայքը տեղեկացնում է, որ հանդիպումները հետաձգվել են Մադրիդի «Ռեալում» և Թուրինի «Յուվենտուսում» հայտարարված կարանտինի պատճառով։ Հիշեցնենք, որ երեկ չկայացան Եվրոպա լիգայի խաղարկության 1/8-րդ եզրափակչի «Ինտեր»-«Խետաֆե» և «Սևիլիա»-«Ռոմա» հանդիպումները։ Նախապես հայտարարված էր, որ Սևիլիայում տեղի ունենալիք հանդիպումը կանցկացվի առանց հանդիսականների, բայց վերջին պահին որոշվեց խաղը հետաձգել։ Հիշեցնենք, որ «Ռոմայում» է ելույթ ունենում Հայաստանի ազգային հավաքականի ավագ Հենրիխ Մխիթարյանը։ Հռոմի թիմում այս պահի դրությամբ կորոնավիրուսի դեպքեր չեն արձանագրվել։
Համաշխարհային ֆուտբոլում և սպորտում արդեն իսկ քաոսային իրավիճակ է, որից դուրս գալու ուղիները դեռևս չեն նշմարվում։ Այսօր հայտնի դարձավ, որ Թուրինի «Յուվենտուսի» արդեն երկրորդ ֆուտբոլիստն է վարակվել կորոնավիրուսով։ Դրական արդյունք է տվել թիմի առաջատար հարձակվող, արգետինացի Պաուլո Դիբալայի թեստը։ Բժիշկները վիրուսի նախանշաններ հայտնաբերել են նաև Դիբալայի հայրենակից Գոնսալո Իգուաինի մոտ, որի հետազոտության պատասխանը հայտնի կդառնա ավելի ուշ: «Յուվենտուսի» 121 հոգանոց անձնակազմը, այդ թվում՝ թիմի ֆուտբոլիստներն ու մարզիչները տեղափոխվել են կարանտին, որտեղ կստուգվի նրանց մոտ վիրուսի առկայությունը: Ավելի վաղ հայտնի էր դարձել, որ կորոնավիրուսով վարակվել է «Յուվենտուսի» իտալացի պաշտպան Դանիելե Ռուգանին:
Արդեն իսկ խոսվում է աշխարհի լավագույն ֆուտբոլիստներից մեկի՝ Կրիշտիանո Ռոնալդուի հնարավոր վարակված լինելու մասին։ Ըստ իտալական աղբյուրների՝ Ռոնալդուն այս պահին գտնվում է հարազատ քաղաքում՝ պորտուգալական Մադեյրայում, և կարանտինի մեջ է: Ռոնալդուն և կորոնավիրուսով վարակված Ռուգանին նախորդ կիրակի միասին մասնակցել են «Ինտերի» դեմ խաղին: Լոնդոնի «Արսենալի» գլխավոր մարզիչ Միկել Արտետայի՝ կորոնավիրուսի թեստի պատասխանը ևս դրական է եղել: Ֆուտբոլիստները, ակումբի աշխատակազմը, ովքեր վերջին շրջանում շփվել են Արտետայի հետ, մեկուսացվել են:
«Արսենալ» ակումբի ամբողջ թիմը կմտնի կարանտինի մեջ: Ինքը՝ մարզիչը, շեշտել է, որ աշխատանքի կվերադառնա, երբ իրեն թույլ տան:
