«Իրենց ռեսուրսները բավարար չեն, և ես կարծում եմ՝ առաջիկա նույնիսկ ժամերի ընթացքում դա տեղի կունենա։ Թաքնվելու տեղ չունեն, փորձեցին պայքարել, դիրքերը պահել, բայց դա անհեռանկար է։ Կարծում եմ՝ պարոն Փաշինյանը կդառնա վարչապետի պաշտոնակատար»,- «Առաջին լրատվական»-ի հետ զրույցում նման տեսակետ հայտնեց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը։
Մեր զրուցակիցը կարծում է, որ միֆ է այն տեսակետը, թե ԵԱՏՄ անդամ երկրներում իշխանափոխություն տեղի չի ունենում. «ԵԱՏՄ-ում կան տարբեր երկրներ՝ Բելառուս, Ղազախստան, Հայաստան, Ռուսաստան և վերջում նաև՝ Ղրղըզստան։ Ես օրերս ցանկն էի կազմել այն երկրների, որտեղ նման իրադարձություններ են տեղի ունեցել՝ Ֆիլիպիններ, Սերբիա, մինչև Աբխազիա, Հարավային Օսիա, Վրաստան, Ուկրաինա։ Ամենանման երկիրը Ղրղըզստանն է, իսկ Ղրղըզստանը ԵԱՏՄ անդամ է»։
Իսկանդարյանի դիտարկմամբ՝ իրականությունը փոխվում էր ժամ առ ժամ, սկզբում Սարգսյանը փորձում էր վերահսկել իրավիճակը: «Բայց երբ գնում էր իրավիճակի ապակենտրոնացում, երբ հանրահավաքները վերածվեցին քաոտիկ իրադարձությունների, երբ այն աշխարհագրորեն այլ տեսք ստացավ, փոխվեց նաև սոցիալապես՝ սկզբում երիտասարդներ էին, հետո արդեն ոչ միայն։ Մինչև այդ իշխանությունները դասական ոստիկանական մեթոդներով էին գործում, իսկ երբ ապակենտրոնացավ՝ դա դարձավ անհնար։ Իսկ առջևում ապրիլի 24-ն էր, պատկերացրեք՝ ինչքան մարդ կար դրսում, անպայման ինչ-որ կողմից կբղավեին՝ «Մերժիր Սերժին», և մարդկանց քանակը ավելի մեծ կլիներ, քան կար նախկինում։ Ելքը մեկն էր՝ կա՛մ ապրիլի 23-ին հայտարարել արտակարգ դրություն, որն անկանխատեսելի հետևանքներ կարող էր ունենալ, կա՛մ էլ գնալ զիջման»,- նկատեց քաղաքագետը։
Ըստ Իսկանդարյանի՝ Սերժ Սարգսյանը որոշում կայացրեց գնալ զիջման՝ մի քանի պատճառով. «Առաջինը՝ նա մարդ է, ով սկսեց իր նախագահությունը Մարտի 1-ով, և գնալ մոտավորապես այդպիսի իրադարձություններով նա չէր ուզում, երկրորդը՝ դա մեծ քաղաքական ռիսկ էր պարունակում։ Նա գնաց արժանապատիվ, նույնը չենք կարող ասել իր նախագահության ողջ ընթացքի մասին, բայց դա վատ քայլ չէր»։
Հարցազրույցն ամբողջությամբ՝ տեսանյութում: