Լոնդոնի բնակիչ Նիք Հերբերթը հավելված է ստեղծել, որը կարեւոր հաղորդագրություն ստանալիս տիրոջ էկրանը «սառեցնում» է եւ բարձր ձայներ արձակում: Այս մասին հայտնում է Mashable-ը:
Հերբերթի մոտ այս գաղափարը ծնվել է, երբ նրա 13 տարեկան որդի Բենը հերթական անգամ մոռացել է ծնողների հաղորդագրությանը պատասխանել: Բրիտանացին համոզված է, որ նման վարքը շատ երեխաների է հատուկ, եւ գտել է այս խնդիրը լուծելու անխափան միջոցը:
Ազդանշանի ձայնը շարունակվում է մինչեւ ստացողը հաղորդագրությունը կկարդա, սակայն նույնիսկ այս դեպքում հեռախոսի մյուս գործառույթներից անհնար է օգտվել, քանի «ապասառեցումը» տեղի է ունենում միայն պատասխանն ուղարկելուց հետո: Մինչ այդ էկրանին պատուհան է պատկերվում՝ համապատասխան կոչով եւ տեքստը հավաքելու հատուկ դաշտով:
ReplyASAP («Հնարավորինս արագ պատասխանիր») կոչվող հավելվածը արդեն հասանելի է Android-ով աշխատող սմարթֆոնների տերերին, իսկ մոտ ժամանակներս կհայտնվի նաեւ iOS-ով աշխատողների համար: